मेक्सिको सिटी, 18 मे (हिं.स.)। मेक्सिकोमधील पुएब्ला राज्यात झालेल्या भीषण सशस्त्र हल्ल्यात किमान १० जणांचा मृत्यू झाला आहे. वृत्तसंस्था रॉयटर्सने दिलेल्या माहितीनुसार, राज्याच्या सार्वजनिक सुरक्षा मंत्रालयाने रविवारी या घटनेची अधिकृत पुष्टी केली. या हल्ल्यामुळे संपूर्ण परिसरात भीतीचे वातावरण निर्माण झाले असून सुरक्षा यंत्रणा सतर्क करण्यात आली आहे.

मंत्रालयाने दिलेल्या माहितीनुसार, मृतांमध्ये सहा पुरुष, तीन महिला आणि एका अल्पवयीन मुलाचा समावेश आहे. हा हल्ला पुएब्ला राज्यातील तेहुइत्झिंगो नगरपालिका परिसरात घडला. येथे सशस्त्र हल्लेखोरांनी नागरिकांना लक्ष्य करत अंधाधुंद गोळीबार केला. हल्ल्यानंतर परिसरात एकच खळबळ उडाली.

घटनेनंतर प्रशासनाने मोठ्या प्रमाणावर सुरक्षा दल तैनात केले आहे. राज्याच्या सार्वजनिक सुरक्षा मंत्रालयाने स्पष्ट केले की, या सामूहिक हत्याकांडातील आरोपींना कोणतीही सूट दिली जाणार नाही. दोषींविरोधात कठोर कारवाई करण्यात येईल आणि “शून्य दंडमुक्ती” धोरणांतर्गत त्यांना शिक्षा मिळवून देण्यासाठी सर्वतोपरी प्रयत्न केले जातील.

या हल्ल्यामागील नेमके कारण अद्याप स्पष्ट झालेले नाही. मात्र, गुप्तचर विभाग आणि तपास यंत्रणा या प्रकरणाचा सखोल तपास करत आहेत. राज्य आणि संघीय तपास संस्थांनी संयुक्त मोहीम सुरू केली असून आरोपींचा शोध घेण्यासाठी विशेष पथके तयार करण्यात आली आहेत.

दरम्यान, या हल्ल्याची जबाबदारी अद्याप कोणत्याही संघटनेने स्वीकारलेली नाही. गेल्या काही वर्षांपासून मेक्सिकोतील अनेक राज्यांमध्ये संघटित गुन्हेगारी, टोळी युद्धे आणि हिंसाचाराच्या घटनांमध्ये मोठी वाढ झाली आहे. त्यामुळे देशातील कायदा व सुव्यवस्था आणि नागरिकांच्या सुरक्षेबाबत गंभीर चिंता व्यक्त केली जात आहे.

---------------

हिंदुस्थान समाचार / Suraj Chaugule