मुंबई, 23 मे (हिं.स.)। भारताची सर्वात मोठी कार उत्पादक कंपनी असलेल्या मारुती सुझुकी इंडिया लिमिटेडने आपल्या वाहनांच्या किमतीत वाढ करण्याची घोषणा केली आहे. कंपनीने बाजार नियामकाला दिलेल्या माहितीत जून २०२६ पासून आपल्या सर्व मॉडेल्सच्या किमतींमध्ये ३० हजार रुपयांपर्यंत वाढ करण्याचा निर्णय घेतल्याचे स्पष्ट केले आहे. इनपुट खर्च सातत्याने वाढत असल्यामुळे हा निर्णय घेण्यात आल्याचे कंपनीने आपल्या अधिकृत निवेदनात सांगितले आहे.
कंपनीने स्पष्ट केले की कच्चा माल आणि दैनंदिन कार्यकारी खर्चात सातत्याने वाढ होत असून त्याचा थेट परिणाम वाहन उद्योगावर होत आहे. गेल्या काही महिन्यांपासून वाढत्या खर्चाचा परिणाम कमी करण्यासाठी कंपनीकडून विविध उपाययोजना करण्यात येत होत्या. खर्चावर नियंत्रण ठेवण्यासाठी अनेक पावले उचलूनही वाढत्या खर्चाचा काही भार अखेर ग्राहकांपर्यंत पोहोचवणे अपरिहार्य ठरत असल्याचे कंपनीने म्हटले आहे.
मारुती सुझुकीने आपल्या निवेदनात म्हटले आहे की, “गेल्या काही महिन्यांपासून कंपनीने खर्च कपात करण्याचे विविध मार्ग शोधले आणि त्यातून वाढत्या खर्चाचा परिणाम शक्य तितका कमी करण्याचा प्रयत्न केला. मात्र, सध्याचे महागाईचे दडपण आणि प्रतिकूल खर्चाचे वातावरण पाहता वाढलेल्या खर्चाचा काही भाग बाजारावर टाकणे आवश्यक झाले आहे. तरीही ग्राहकांवर होणारा परिणाम कमीत कमी राहावा, यासाठी कंपनीने प्रयत्न सुरू ठेवले आहेत.” कंपनीने हेही नमूद केले की ही वाढ प्रत्येक मॉडेलनुसार वेगळी असेल.
ही घोषणा अशा काळात झाली आहे, जेव्हा भारतातील अनेक वाहन उत्पादक कंपन्या वाढत्या कमोडिटी किमती, वाहतूक खर्च आणि पुरवठा साखळीवरील महागाईच्या दबावामुळे आपल्या वाहनांच्या किमती वाढवत आहेत. यापूर्वी महिंद्रा अँड महिंद्रानेही आपल्या एसयूव्ही आणि व्यावसायिक वाहन श्रेणीच्या किमती वाढवण्याचा निर्णय जाहीर केला होता. कंपनीने वाढत्या इनपुट आणि कार्यकारी खर्चाचा उल्लेख करत ६ एप्रिलपासून किमतींमध्ये २.५ टक्क्यांपर्यंत वाढ केली होती, तर सर्व मॉडेल्समध्ये सरासरी वाढ सुमारे १.६ टक्के असल्याचे सांगितले होते.
वाहन बाजारातील सतत वाढणाऱ्या खर्चामुळे कंपन्यांवर किमती वाढवण्याचा दबाव वाढत असून त्याचा थेट परिणाम ग्राहकांच्या खिशावर होणार आहे. मारुती सुझुकीच्या या निर्णयामुळे येत्या जूनपासून नव्या वाहनांच्या खरेदीवर अधिक खर्च करावा लागणार असल्याचे स्पष्ट झाले आहे.
---------------
हिंदुस्थान समाचार / Suraj Chaugule
