मुंबई, 28 मे (हिं.स.) - नॅशनल स्टॉक एक्स्चेंज ऑफ इंडिया (NSE) ने इलेक्ट्रॉनिक गोल्ड रिसीट्स (EGRs) निर्मिती आणि व्हॉल्टिंगसाठी सिक्वेल लॉजिस्टिक्ससोबत भागीदारीची घोषणा केली आहे. एनएसईवरील ईजीआर व्यवहारांच्या प्रारंभाचे आणि भारतात मजबूत ईजीआर परिसंस्था उभारण्याच्या दोन्ही संस्थांच्या संयुक्त वचनबद्धतेचे स्मरण म्हणून आज घंटानाद समारंभ आयोजित करण्यात आला.

सिक्वेल लॉजिस्टिक्स सध्या देशभरात २३ व्हॉल्ट्सचे जाळे चालवते, जिथे गुंतवणूकदार आणि बाजारातील सहभागी ईजीआरची निर्मिती आणि समाप्ती करू शकतील. हे व्हॉल्टिंग जाळे ईजीआर मूल्यसाखळीचा महत्त्वपूर्ण भाग असून, एक्स्चेंजवर जारी करण्यात येणाऱ्या प्रत्येक इलेक्ट्रॉनिक गोल्ड रिसीटला आधार असलेल्या प्रत्यक्ष सोन्याच्या सुरक्षित साठवणुकीची खात्री देते.

या भागीदारीबाबत बोलताना एनएसईचे मुख्य व्यवसाय विकास अधिकारी श्रीराम कृष्णन म्हणाले, “इलेक्ट्रॉनिक गोल्ड रिसीट्स विभागात सिक्वेल लॉजिस्टिक्ससोबत भागीदारी करताना आम्हाला आनंद होत आहे. विश्वासार्ह, सुरक्षित आणि व्यापक व्हॉल्टिंग नेटवर्क हे ईजीआर परिसंस्थेच्या विश्वासार्हतेसाठी मूलभूत आहे आणि देशभरातील सिक्वेलचे मजबूत जाळे मोठ्या प्रमाणावर ईजीआर निर्मिती आणि समाप्ती प्रक्रियेला सक्षमपणे समर्थन देऊ शकते. ईजीआर हे भारतातील सोन्याच्या वित्तीयकरणाच्या दिशेने महत्त्वपूर्ण पाऊल आहे. हे गुंतवणूकदारांना प्रत्यक्ष सोन्याच्या पाठबळावर आधारित पारदर्शक, एक्स्चेंजवर व्यवहार होणारे आणि प्रमाणित साधन उपलब्ध करून देते. सिक्वेल लॉजिस्टिक्सच्या वचनबद्धतेबद्दल आम्ही त्यांचे आभार मानतो आणि या विभागाच्या वाढीसाठी त्यांच्यासोबत जवळून काम करण्यास उत्सुक आहोत.”

या घडामोडीबाबत सिक्वेल लॉजिस्टिक्सचे व्यवस्थापकीय संचालक आणि संस्थापक राजकुमार एस म्हणाले, “इलेक्ट्रॉनिक गोल्ड रिसीट्स विभागासाठी एनएसईसोबत भागीदारी करताना आम्हाला अभिमान वाटतो. भारतीय भांडवली बाजारासाठी हा एक मैलाचा दगड ठरणारा उपक्रम आहे. सिक्वेलने गेल्या काही वर्षांत सुरक्षा, पारदर्शकता आणि कार्यक्षमतेवर लक्ष केंद्रित करून आपली व्हॉल्टिंग पायाभूत सुविधा उभारली आहे आणि ईजीआर निर्मिती व समाप्तीसाठी २३ व्हॉल्ट्सचे हे जाळे उपलब्ध करून देताना आम्हाला आनंद होत आहे. भारतातील सोन्याच्या वित्तीयकरणात ईजीआर महत्त्वाची भूमिका बजावतील, असा आमचा विश्वास आहे आणि या उत्पादनाबाबत व्यापक प्रमाणात वाढ व गुंतवणूकदारांचा विश्वास निर्माण करण्यासाठी एनएसई आणि संपूर्ण परिसंस्थेला सहकार्य करण्यास सिक्वेल कटिबद्ध आहे.”

---------------

हिंदुस्थान समाचार / सुधांशू जोशी