मुंबई, 28 मे (हिं.स.)। ईदच्या शुभप्रसंगी आपल्या चाहत्यांना एक खास भेट देत, बॉलिवूड अभिनेता सलमान खानने त्याच्या आगामी चित्रपट ‘मातृभूमी’ मधील 'मैं हूँ...' हे नवीन गाणे प्रदर्शित केले आहे. सलमानने या गाण्याचा व्हिडिओ सोशल मीडियावर शेअर केला, ज्यामुळे त्याच्या चाहत्यांमध्ये प्रचंड उत्साह संचारला आहे. या गाण्यातील त्याच्या दमदार आणि भावस्पर्शी अभिनयाचे प्रेक्षकांकडून सर्वत्र कौतुक होत आहे.
या गाण्यात सलमान खान अभिनेत्री चित्रांगदा सिंगसोबत एका रोमँटिक अंदाजात दिसून येत आहे. या व्हिडिओमध्ये चित्रांगदा आपल्या पतीच्या आठवणीत रमलेली दिसते; तिचा पती देशाच्या रक्षणासाठी सीमेवर तैनात आहे. या हृदयस्पर्शी गाण्याला सुप्रसिद्ध गायिका श्रेया घोषालने आपला मधुर आवाज दिला आहे, ज्यामुळे हे गाणे अधिकच खास बनले आहे.
चाहत्यांसोबतच बॉलिवूडमधील अनेक कलाकारांनीही सलमान खानच्या या पोस्टवर प्रतिक्रिया दिल्या आहेत. राखी सावंत आणि कुनिका सदानंद यांच्यासह अनेक कलाकारांनी सलमानला ईदच्या शुभेच्छा दिल्या आहेत. या चित्रपटामध्ये सलमान खान एका लष्करी अधिकाऱ्याची भूमिका साकारत आहे. या चित्रपटाचे दिग्दर्शन अपूर्व लाखिया यांनी केले आहे.
---------------
हिंदुस्थान समाचार / हर्षदा गावकर
30 May 2026
