- नवे फीचर्स आणि डिझाइनसह बाजारात प्रवेश

मुंबई, 29 मे (हिं.स.) : स्वदेशी वाहननिर्माता टाटा मोटर्सने भारतात आपली फेसलिफ्टेड 2026 टियागो आणि टियागो ईव्ही अधिकृतपणे लाँच केली आहे. कंपनीने टियागो आयसीईची सुरुवातीची किंमत 4.69 लाख रुपये तर टियागो ईव्हीची सुरुवात 6.99 लाख रुपये (एक्स-शोरूम) अशी जाहीर केली आहे.

नव्या मॉडेलमध्ये डिझाइनपासून केबिन, फीचर्स आणि सेफ्टीपर्यंत अनेक महत्त्वाचे बदल करण्यात आले आहेत. समोरच्या बाजूला नवीन कोनदार हेडलॅम्प, बंद प्रकारची ग्रिल आणि सुधारित बंपर देण्यात आला आहे. आयसीई व्हर्जनमध्ये काळी ग्रिल असून ईव्हीमध्ये बॉडी-कलर ग्रिल देण्यात आली आहे. मागील बाजूस दोन्ही व्हेरिएंटमध्ये नवीन आयताकृती टेल लॅम्प आणि टोक ते टोक जोडणारा लाइट बार दिसतो.

केबिनमध्ये मोठे अपडेट करण्यात आले असून 10.25 इंचांची फ्री-स्टँडिंग टचस्क्रीन, डिजिटल इन्स्ट्रुमेंट क्लस्टर आणि नवीन दोन-स्पोक स्टीयरिंग व्हील देण्यात आले आहे. टियागो ईव्हीमध्ये टाटा ईव्ही बॅजिंगसह खास डिझाइन घटक देण्यात आले आहेत. टॉप व्हेरिएंटमध्ये स्मार्टफोन चार्जिंग ट्रेही उपलब्ध आहे.

फीचर्सच्या बाबतीत 360-डिग्री कॅमेरा, ब्लाइंड स्पॉट मॉनिटरिंग, सहा एअरबॅग्ज, ऑटो एसी, रिअर एसी व्हेंट, वायरलेस चार्जिंग, कीलेस एंट्री-गो आणि 65W टाइप-सी चार्जिंग पोर्ट यांसारख्या सुविधा देण्यात आल्या आहेत. सुरक्षिततेसाठी ईएसपी, ट्रॅक्शन कंट्रोल, हिल स्टार्ट असिस्ट आणि टायर प्रेशर मॉनिटरिंग सिस्टमचा समावेश आहे.

पॉवरट्रेनबाबत टियागो आयसीईमध्ये 1.2 लिटर पेट्रोल इंजिन आणि सीएनजी पर्याय कायम ठेवण्यात आला आहे. तर टियागो ईव्हीमध्ये 19.2 kWh आणि 24 kWh बॅटरी पर्याय मिळतो, जो 215 किमीपर्यंतची रेंज देतो. 30 kW डीसी फास्ट चार्जरच्या मदतीने कार 10 ते 80 टक्के फक्त 30 मिनिटांत चार्ज होते.

बाजारातील स्पर्धेत टियागो आयसीईची थेट टक्कर मारुती सुझुकी सेलेरियो आणि ह्युंदाई ग्रँड आय-10 नियोजशी होणार आहे, तर टियागो ईव्हीची तुलना एमजी कॉमेट ईव्हीशी केली जाण्याची शक्यता आहे.

-------------------------

हिंदुस्थान समाचार / Suraj Chaugule