कोलकाता , 31 मे (हिं.स.)।तृणमूल काँग्रेसचे (टीएमसी) नेते आणि खासदार अभिषेक बॅनर्जी यांच्यावर झालेल्या हल्ल्याप्रकरणी पोलिसांनी पाच जणांना अटक केली आहे. माध्यमांच्या वृत्तानुसार, अटक करण्यात आलेल्यांमध्ये तपन मैती आणि आकाश यांचाही समावेश आहे. हे दोघेही कथितपणे घटनेशी संबंधित व्हिडिओमध्ये दिसल्याचे सांगितले जात आहे. या प्रकरणाच्या तपासाअंतर्गत पोलिसांनी एकूण पाच जणांना ताब्यात घेतले आहे.

दक्षिण 24 परगणा जिल्ह्यातील सोनारपूर येथे अभिषेक बॅनर्जी यांच्यावर जमावाने हल्ला केला होता. निवडणुकीनंतर झालेल्या हिंसाचारातील पीडितांची भेट घेण्यासाठी ते तेथे गेले असताना हा प्रकार घडला. हल्ला झाल्यानंतरही त्यांनी हिंसाचारात मृत्यू झालेल्या टीएमसी कार्यकर्ते संजू कर्माकर यांच्या कुटुंबीयांची भेट घेतली. या हल्ल्यात जमावाने अभिषेक बॅनर्जी यांच्यावर अंडी आणि दगडफेक केली होती.

दरम्यान, ममता बॅनर्जी यांनी आपल्या पुतण्यावर झालेल्या हल्ल्याच्या निषेधार्थ रविवारी आंदोलनाची घोषणा केली आहे. ममता बॅनर्जी यांनी या हल्ल्यासाठी भारतीय जनता पक्ष (भाजप) ला जबाबदार धरले आहे. मात्र, सत्ताधारी पक्षाने हे आरोप फेटाळून लावले आहेत. घटनेवर प्रतिक्रिया देताना ममता बॅनर्जी म्हणाल्या, “मला सांगण्यात आले आहे की, त्यांच्या डोक्यावर हेल्मेट नसते तर त्यांचा मृत्यूही होऊ शकला असता.” त्यांनी दावा केला की, दगडफेक आणि मारहाणीमुळे अभिषेक बॅनर्जी यांच्या छाती व बरगड्यांना दुखापत झाली आहे. तसेच त्यांना वैद्यकीय उपचार मिळू नयेत यासाठीही प्रयत्न करण्यात आल्याचा आरोप त्यांनी केला.

ममता बॅनर्जी यांनी राहुल गांधींनी केलेल्या मदतीच्या प्रस्तावाचाही उल्लेख केला. त्या म्हणाल्या, “राहुल गांधी यांनी मला फोन करून अभिषेक यांच्या उपचारांसाठी त्यांना हैदराबाद किंवा इतर कोणत्याही ठिकाणी नेण्याची तयारी दर्शवली.”

दुसरीकडे, भाजपने या घटनेतील कोणत्याही सहभागाचा स्पष्ट नकार दिला आहे. पश्चिम बंगाल भाजपचे प्रदेशाध्यक्ष शमिक भट्टाचार्य यांनी हा हल्ला दुर्दैवी असल्याचे म्हटले. मात्र, हा प्रकार तृणमूल काँग्रेसविरोधातील जनतेच्या तीव्र नाराजीचे प्रतीक असल्याचाही दावा त्यांनी केला. तृणमूल काँग्रेसच्या राजकीय हिंसाचाराच्या इतिहासाचा उल्लेख करताना त्यांनी सांगितले की, यामध्ये पूर्वीच्या काळात तत्कालीन मुख्यमंत्री शुभेंदू अधिकारी आणि इतर भाजप नेत्यांवर झालेल्या कथित हल्ल्यांचाही समावेश आहे. ते म्हणाले, “पश्चिम बंगालची राजकीय संस्कृती बदलण्यासाठी सर्व राजकीय पक्षांनी एकत्रित प्रयत्न करावेत, असे मी आवाहन करतो.”

---------------

हिंदुस्थान समाचार / Priyanka Bansode