वेलिंग्टनहू, 24 जून, (हिं.स.) - न्यूझीलंड क्रिकेट संघाचे माजी वेगवान गोलंदाज बॉब ब्लेअर यांचे इंग्लंडमध्ये त्यांच्या ९४ व्या वाढदिवशी निधन झाले. ब्लेअर हे केवळ विक्रमवीर क्रिकेटपटूच नव्हते, तर ते उत्कटता, धैर्य आणि खिलाडूवृत्तीचे एक उत्तम उदाहरण होते.

न्यूझीलंड क्रिकेट बोर्डाने तीव्र शोक व्यक्त करत त्यांच्या निधनाच्या बातमीला दुजोरा दिला आहे. इतकेच नव्हे तर, ब्लेअर यांना श्रद्धांजली वाहण्यासाठी किवी संघ इंग्लंडविरुद्धच्या नॉटिंगहॅम कसोटीच्या पहिल्या दिवशी हातावर काळी पट्टी बांधणार आहे.

१९५२ ते १९६४ या काळात न्यूझीलंडसाठी १९ कसोटी सामने खेळलेल्या ब्लेअर यांनी ४३ बळी घेतले होते. देशांतर्गत क्रिकेटमध्ये, त्यांनी ५९ प्रथम-श्रेणी सामन्यांमध्ये ३३० बळी मिळवले होते. १९५६-५७ च्या हंगामात, त्यांनी केवळ ९ च्या सरासरीने घेतलेल्या प्रभावी ४६ बळींमुळे आणि दोनदा ९ बळी घेण्याच्या कामगिरीमुळे प्रसिद्धी मिळवली होती.

बॉब ब्लेअर यांनी जवळपास एक दशकभर न्यूझीलंडचे प्रतिनिधित्व केले. १९६४ मध्ये दक्षिण आफ्रिकेविरुद्ध खेळताना त्यांनी आपल्या कारकिर्दीतील सर्वोत्तम सात बळी मिळवले. क्रिकेटबद्दलची त्यांची आवड कधीही कमी झाली नाही. वयाच्या ६० वर्षांनंतरही ते क्रिकेट खेळत राहिले आणि ४० हून अधिक हंगामांसाठी मैदानावर सक्रिय होते. खेळातून निवृत्त झाल्यानंतर त्यांनी इंग्लंड, दक्षिण आफ्रिका, झिम्बाब्वे, नॉर्दर्न आयर्लंड आणि ऑस्ट्रेलिया येथे प्रशिक्षक म्हणूनही काम केले होते.

---------------

हिंदुस्थान समाचार / वृषाली देशपांडे