मुंबई, 25 जून (हिं.स.)। अभिनेता अक्षय कुमारचा बहुप्रतिक्षित विनोदी चित्रपट 'वेलकम टू द जंगल' प्रदर्शनापूर्वीच प्रेक्षकांमध्ये चर्चेचा विषय ठरला आहे. चित्रपटाचा ट्रेलर आणि यापूर्वी प्रदर्शित झालेली गाणी यांना मिळालेल्या जबरदस्त प्रतिसादानंतर, आता निर्मात्यांनी 'ओ मेरे बालम' हे नवीन गाणे प्रदर्शित केले आहे. हे गाणे सोशल मीडियावर वेगाने व्हायरल होत असून प्रेक्षकांचे लक्ष वेधून घेत आहे.

यूट्यूबवर प्रदर्शित झालेल्या या म्युझिक व्हिडिओमध्ये चित्रपटातील सर्व प्रमुख कलाकार पाहायला मिळतात. काव्यकृती आणि साकेत बैरोलिया यांनी हे गाणे गायले असून, फरहाद सामजी यांनी याचे गीतलेखन केले आहे आणि आनंद राज आनंद यांनी संगीत दिले आहे. रंगीबेरंगी दृश्ये आणि उत्साही, मजेशीर शैलीने नटलेले हे गाणे चित्रपटाच्या विनोदी आणि मनोरंजक विश्वाची झलक दाखवते.

अक्षय कुमारसोबतच या चित्रपटात दिशा पटानी, जॅकलीन फर्नांडिस, सुनील शेट्टी आणि राजपाल यादव हे कलाकार महत्त्वपूर्ण भूमिकांमध्ये आहेत. यापूर्वी 'वेलकम टू द जंगल'चे शीर्षक गीत, 'दीवाने हैं', 'तेरा पैसा मेरा पैसा' आणि 'उंचा लंबा कद फॉरएव्हर' ही गाणीही प्रदर्शित झाली आहेत. अहमद खान दिग्दर्शित हा चित्रपट प्रेक्षकांना भरपूर विनोद आणि मनोरंजनाची मेजवानी देण्याचे आश्वासन देतो.

---------------

हिंदुस्थान समाचार / हर्षदा गावकर