मुंबई, 25 जून (हिं.स.)। अभिनेत्री सामंथा रुथ प्रभूने तिच्या गरोदरपणाची बातमी अधिकृतपणे जाहीर केली आहे. गेल्या काही दिवसांपासून सोशल मीडियावर सुरू असलेल्या चर्चांच्या पार्श्वभूमीवर, सामंथाने 'मा इन्ती बंगारम' (Maa Inti Bangaram) या तेलगू चित्रपटाच्या एका प्रचार कार्यक्रमादरम्यान ही आनंदाची बातमी दिली. या कार्यक्रमात तिचे पती आणि दिग्दर्शक राज निदिमोरू हे देखील तिच्यासोबत उपस्थित होते. आपण लवकरच आपल्या पहिल्या बाळाला जन्म देणार असल्याचे अभिनेत्रीने यावेळी सांगितले.

'मा इन्ती बंगारम' या चित्रपटाच्या यशानंतर, या घोषणेमुळे सामंथाच्या चाहत्यांचा आनंद द्विगुणित झाला आहे. तिच्या गरोदरपणाबाबतच्या अनेक दिवसांपासून सुरू असलेल्या अफवांना पूर्णविराम देत, अभिनेत्रीने आपल्या आयुष्यातील या नवीन टप्प्याबद्दलचा आनंद व्यक्त केला. ही बातमी समजताच सोशल मीडियावर चाहते आणि चित्रपटसृष्टीतील मान्यवरांनी अभिनंदनाचा वर्षाव करण्यास सुरुवात केली.

कार्यक्रमादरम्यान सामंथाने असेही सांगितले की, सध्याचे प्रकल्प पूर्ण केल्यानंतर ती अभिनयातून काही काळासाठी विश्रांती घेणार आहे. गरोदरपणामुळे कुटुंबासोबत वेळ घालवण्यासाठी ती 'मॅटर्निटी लीव्ह' (प्रसूती रजा) घेणार असल्याचे तिने स्पष्ट केले. मात्र, ही विश्रांती अल्प काळासाठीच असेल आणि आपण लवकरच एका नवीन चित्रपटासह पुन्हा पडद्यावर परतणार आहोत, अशी ग्वाही तिने चाहत्यांना दिली.

---------------

हिंदुस्थान समाचार / हर्षदा गावकर