नवी दिल्ली, 26 जून (हिं.स.)। फिफा विश्वचषक २०२६ च्या अंतिम ३२ फेरीसाठी आणखी एका सामन्याची पुष्टी झाली आहे. पाच वेळचा विश्वविजेता ब्राझील आता नॉकआउट (बाद) फेरीमध्ये जपानचा सामना करेल. हा सामना २९ जून रोजी अमेरिकेतील ह्यूस्टन स्टेडियमवर भारतीय प्रमाणवेळेनुसार रात्री १०:३० वाजता सुरू होईल.

गट 'एफ' मधील आपल्या अंतिम सामन्यात स्वीडनविरुद्ध १-१ अशा बरोबरीनंतर जपानने चार गुण मिळवले, नेदरलँड्सच्या मागे दुसऱ्या स्थानावर राहून अंतिम ३२ मध्ये प्रवेश केला. दरम्यान, ब्राझीलने दोन विजय आणि एका बरोबरीसह गट 'सी' मध्ये अव्वल स्थान मिळवून बाद फेरीत प्रवेश केला.ब्राझीलच्या गटात दुसऱ्या स्थानावर राहिलेला मोरोक्को आता अंतिम ३२ मध्ये नेदरलँड्सचा सामना करेल.

ब्राझील आणि जपान यांच्यातील शेवटचा सामना ऑक्टोबर २०२५ मध्ये एका आंतरराष्ट्रीय मैत्रीपूर्ण सामन्यात झाला होता, ज्यात जपानने ३-२ ने विजय मिळवून इतिहास रचला होता. १४ सामन्यांनंतर ब्राझीलवर जपानचा हा पहिला विजय होता.मात्र, विश्वचषकाच्या इतिहासात हे दोन संघ फक्त एकदाच आमनेसामने आले आहेत. २००६ च्या विश्वचषकात ब्राझीलने जपानचा ४-१ ने पराभव केला होता. आता, जवळपास दोन दशकांनंतर, हे दोन संघ विश्वचषकाच्या मंचावर पुन्हा एकदा आमनेसामने येणार आहेत. जपानला आपल्या मागील विजयाचा आत्मविश्वास असेल, तर ब्राझील आपला प्रभावी विक्रम कायम ठेवण्याचा प्रयत्न करेल.

---------------

हिंदुस्थान समाचार / Suraj Chaugule