नवी दिल्ली, 03 जून (हिं.स.)। खालच्या पातळीवर झालेली मूल्य खरेदी आणि सार्वजनिक क्षेत्रातील बँकांच्या शेअर्समध्ये झालेल्या जोरदार रिकव्हरीमुळे देशांतर्गत शेअर बाजाराने मोठ्या घसरणीनंतर काहीसा सावरलेला दिसला, तरी अखेरीस तो कमजोरीसहच बंद झाला. सेन्सेक्स उच्चांकावरून ३०३.६७ अंकांनी घसरून तोट्यासह ७४,३४६.१७ वर बंद झाला. तर निफ्टी ही उच्चांकावरून 77.95 अंकांनी घसरून २३,४०५.६० वर बंद झाला.
व्यापाराच्या सुरुवातीपासूनच बाजारावर विक्रीचा व्यापक दबाव राहिला आणि सेन्सेक्स तसेच निफ्टी दोन्ही निर्देशांकांनी मोठी घसरण नोंदवली. सेन्सेक्स सुरुवातीला १,१५० अंकांपेक्षा अधिक कोसळला, तर निफ्टीनेही ३३० अंकांहून अधिक घसरण अनुभवली. अमेरिकेकडून भारतावर पुन्हा अतिरिक्त आयातशुल्क लादले जाऊ शकते, तसेच पश्चिम आशियातील तणाव पुन्हा वाढण्याची शक्यता, या कारणांमुळे बाजारात भीतीचे वातावरण निर्माण झाल्याचे मानले जात आहे. मात्र दुपारनंतर खरेदीदार सक्रिय झाल्याने दोन्ही निर्देशांकांनी चांगली सावरणारी हालचाल दाखवली. सेन्सेक्सने नीचांकी पातळीवरून १,०२३ अंकांची रिकव्हरी घेतली, तर निफ्टीने ३०८ अंकांची उसळी घेतली. तरीही संपूर्ण दिवसभर दोन्ही निर्देशांक लाल निशाणातच राहिले आणि अखेरीस सेन्सेक्स ०.४१ टक्क्यांच्या, तर निफ्टी ०.३३ टक्क्यांच्या घसरणीसह बंद झाले.
आजच्या व्यवहारात माहिती तंत्रज्ञान क्षेत्रात जोरदार विक्री दिसून आली. निफ्टीचा माहिती तंत्रज्ञान निर्देशांक ५.५७ टक्क्यांनी घसरला, तर मुंबई शेअर बाजाराचा तंत्रज्ञान निर्देशांक ३.१२ टक्क्यांनी खाली आला. ग्राहक टिकाऊ वस्तू, अन्न व दैनंदिन उपभोग्य वस्तू, तेल व वायू आणि धातू क्षेत्रातील निर्देशांकही कमजोरीसह बंद झाले. दुसरीकडे सार्वजनिक क्षेत्रातील उद्योग, आरोग्य सेवा, भांडवली वस्तू आणि वाहन क्षेत्रातील निर्देशांकांनी वाढ नोंदवली. व्यापक बाजारातही विक्रीचा दबाव कायम राहिला. मिडकॅप निर्देशांक ०.४२ टक्के, तर स्मॉलकॅप निर्देशांक ०.११ टक्क्यांनी घसरला.
दिवसभरातील व्यवहारादरम्यान, बीएसईवर ४,३८६ शेअर्सचा सक्रियपणे व्यापार झाला. यापैकी १,८१२ शेअर्स वाढीसह बंद झाले, २,४०० शेअर्समध्ये घट झाली आणि १७४ शेअर्समध्ये कोणताही बदल झाला नाही. आज एनएसईवर २,९८५ शेअर्सचा सक्रिय व्यापार झाला. यापैकी १,२०८ शेअर्स वाढीसह बंद झाले, तर १,७७७ शेअर्स घसरणीसह बंद झाले. त्याचप्रमाणे, सेन्सेक्समध्ये समाविष्ट असलेल्या ३० स्टॉक्सपैकी १३ स्टॉक्स वाढीसह आणि १७ स्टॉक्स घसरणीसह बंद झाले. निफ्टीमध्ये समाविष्ट असलेल्या ५० स्टॉक्सपैकी २२ स्टॉक्स वाढीसह आणि २८ स्टॉक्स घसरणीसह बंद झाले.
बाजारातील घसरणीमुळे गुंतवणूकदारांच्या संपत्तीत मोठी घट झाली. मुंबई शेअर बाजारातील सूचीबद्ध कंपन्यांचे एकूण बाजारमूल्य ४६२.०३ लाख कोटी रुपयांवरून घसरून ४६०.९८ लाख कोटी रुपये झाले. त्यामुळे गुंतवणूकदारांना सुमारे १.०५ लाख कोटी रुपयांचा फटका बसला.
सेन्सेक्समधील अपोलो हॉस्पिटल, टीएमपीव्ही, मॅक्स हेल्थकेअर, स्टेट बँक ऑफ इंडिया आणि आयसीआयसीआय बँक हे शेअर्स वाढीसह बंद झाले, तर टीसीएस, टेक महिंद्रा, एचसीएल टेक्नॉलॉजी, इन्फोसिस आणि विप्रो हे प्रमुख घसरणीचे समभाग ठरले.
---------------
हिंदुस्थान समाचार / Suraj Chaugule
