वॉशिंग्टन , 03 जून (हिं.स.)।अमेरिकेने दावा केला आहे की, त्याच्या सैन्याने परिसरातील शेजारी देशांना लक्ष्य करणाऱ्या इराणच्या क्षेपणास्त्र आणि ड्रोन हल्ल्यांची मालिका हाणून पाडली आहे. यासोबतच अमेरिकेने इराणच्या केश्म बेटावर प्रत्युत्तरात्मक कारवाईही केली आहे. अमेरिकन सेंट्रल कमांड (सेंटकॉम)ने अधिकृत निवेदनात म्हटले आहे की, तेहरानने या प्रदेशात हवाई हल्ल्यांची एक लाट सुरू केली होती.

लष्करी कमांडने सांगितले की, इराणने शेजारील देशांच्या दिशेने अनेक बॅलिस्टिक क्षेपणास्त्रे डागली. मात्र, त्यापैकी एकाही क्षेपणास्त्राला लक्ष्य भेदता आले नाही. सेंटकॉमने प्रादेशिक सहयोगी देशांसोबत केलेल्या संरक्षणात्मक कारवाईचा तपशील देताना सांगितले की, कुवेतकडे डागण्यात आलेली दोन इराणी क्षेपणास्त्रे लक्ष्यापर्यंत पोहोचू शकली नाहीत किंवा मार्गातच नष्ट झाली. तसेच बहरीनकडे प्रक्षेपित करण्यात आलेली तीन क्षेपणास्त्रे अमेरिकन आणि बहरीनच्या हवाई संरक्षण दलांनी तत्काळ अडवली.

प्राथमिक हल्ल्यांनंतर बुधवारी सकाळी नव्या हल्ल्यांची आणखी एक लाट सुरू झाली. कुवेती अधिकाऱ्यांनी पुष्टी केली की, देशाच्या विविध भागांत मोठ्या स्फोटांचे आवाज ऐकू आल्यानंतर कुवेतच्या हवाई संरक्षण यंत्रणेने येणारी क्षेपणास्त्रे आणि ड्रोन सक्रियपणे अडवून निष्प्रभ केले. या घडामोडींमध्ये इराणच्या सरकारी प्रसारमाध्यमांनी दावा केला की, पर्शियन आखातातील अलीकडील पाश्चिमात्य लष्करी सरावांना प्रत्युत्तर म्हणून कुवेतमधील अमेरिकन लष्करी तळांना जाणीवपूर्वक लक्ष्य करण्यात आले.

कुवेतच्या लष्करी जनरल स्टाफने जारी केलेल्या अधिकृत निवेदनानुसार, स्थानिक नागरिकांनी नोंदवलेले भीषण स्फोट हे येणाऱ्या हवाई धोक्यांविरोधात करण्यात आलेल्या संरक्षणात्मक कारवाईशी थेट संबंधित होते.लष्करी कमांडने जाहीर केले की, कुवेतची हवाई संरक्षण यंत्रणा सध्या शत्रुत्वपूर्ण क्षेपणास्त्र आणि ड्रोन हल्ल्यांचा सामना करत आहे. जनरल स्टाफच्या म्हणण्यानुसार, ऐकू येणारे स्फोट हे हवाई संरक्षण प्रणालींकडून करण्यात आलेल्या अडथळा कारवाईचे परिणाम आहेत. संरक्षणात्मक कारवायांनंतर लष्कराने नागरिकांना कोणत्याही पडलेल्या अवशेषांजवळ, धातूच्या तुकड्यांजवळ किंवा अज्ञात वस्तूंजवळ न जाण्याचा आणि त्यांना स्पर्श न करण्याचा इशारा दिला. अशा वस्तूंमुळे गंभीर सुरक्षाधोका निर्माण होऊ शकतो, असेही त्यांनी स्पष्ट केले. संरक्षण मंत्रालयाचे प्रवक्ते कर्नल सौद अब्दुलअजीज अल-ओतैबी यांनी नागरिक आणि परदेशी रहिवाशांना कोणताही संशयास्पद अवशेष आढळल्यास तातडीने ११२ या हेल्पलाइन क्रमांकावर संपर्क साधण्याचे आवाहन केले. त्यांनी अफवांवर विश्वास न ठेवण्याचा आणि केवळ सरकारमान्य माहिती माध्यमांद्वारेच माहितीची पडताळणी करण्याचा सल्लाही दिला.

दरम्यान, इराणच्या सरकारी प्रसारकने दावा केला की, वॉशिंग्टनच्या आक्रमक कारवायांच्या निषेधार्थ तेहरानने अमेरिकेच्या लष्करी पायाभूत सुविधांना लक्ष्य केले. या कारवाया पर्शियन आखात, होर्मुझ सामुद्रधुनी आणि केश्म बेटापर्यंत पसरलेल्या होत्या.इराणी सरकारी प्रसारकाच्या म्हणण्यानुसार, “पर्शियन आखात, होर्मुझ सामुद्रधुनी आणि केश्म बेटावरील अमेरिकेच्या शत्रुत्वपूर्ण कारवायांनंतर कुवेतमधील अमेरिकन तळांवर हल्ला करण्यात आला.”

इराण, अमेरिका आणि इस्रायल यांच्यातील अलीकडील थेट लष्करी संघर्षांनंतर प्रादेशिक स्थैर्य झपाट्याने ढासळत असताना या घटना घडत आहेत. वाढत्या तणावाच्या पार्श्वभूमीवर शेजारील बहरीनमध्येही आणीबाणीची सुरक्षा व्यवस्था सक्रिय करण्यात आली. देशाच्या गृह मंत्रालयाने सायरन वाजवून नागरिकांना शांत राहण्याचे आणि जवळच्या सुरक्षित ठिकाणी जाण्याचे निर्देश दिले. कुवेतच्या सैन्याने पुन्हा एकदा स्पष्ट केले की, त्यांचे दल क्षेपणास्त्र आणि ड्रोन हल्ल्यांना प्रत्युत्तर देत आहे. देशभरात ऐकू येणारे मोठे स्फोट हे स्थानिक पातळीवरील अडथळा कारवाईमुळे होत असल्याचे कुवेतने पुन्हा अधोरेखित केले. सेंटकॉमने जारी केलेल्या ताज्या कार्यवाही अहवालात म्हटले आहे की, त्यांच्या स्थानिक दलांनी कुवेतमधील अमेरिकन सैन्याला लक्ष्य करणारी इराणची दोन बॅलिस्टिक क्षेपणास्त्रे यशस्वीरित्या अडवली.

---------------

हिंदुस्थान समाचार / Priyanka Bansode