रायगड, 10 जुलै (हिं.स.)। : अतिवृष्टीदरम्यान नागरिकांच्या मदतकार्यात सहभागी होत असताना दुर्दैवी मृत्यू झालेल्या खालापूर तालुक्यातील शिळफाटा येथील अमन शफिक मुजावर यांच्या कुटुंबाला शासनाच्या वतीने चार लाख रुपयांचा सानुग्रह सहाय्याचा धनादेश महसूल प्रशासनामार्फत सुपूर्द करण्यात आला. या प्रकरणात खालापूर महसूल प्रशासनाने तातडीने कार्यवाही करून आवश्यक कागदपत्रांची पूर्तता आणि पडताळणी पूर्ण केल्याने कुटुंबाला वेळेत आर्थिक मदत मिळाली.

६ जुलै २०२६ रोजी खोपोली परिसरात झालेल्या अतिवृष्टीदरम्यान अमन मुजावर यांनी नागरिकांच्या मदतीसाठी स्वयंस्फूर्तीने सहभाग घेतला होता. खोपोलीजवळील सायमाळ परिसरात मुंबई–पुणे राष्ट्रीय महामार्ग क्रमांक ४८ वर झाड आणि दरड कोसळल्याने निर्माण झालेल्या आपत्कालीन परिस्थितीत मदतकार्य सुरू असताना झाडाची फांदी त्यांच्या अंगावर पडली. या दुर्घटनेत ते गंभीर जखमी झाले आणि उपचारादरम्यान त्यांचे निधन झाले.

या घटनेनंतर शासनाने मंजूर केलेल्या चार लाख रुपयांच्या सानुग्रह सहाय्याचा धनादेश अमन मुजावर यांच्या कुटुंबाला सुपूर्द करण्यात आला. यावेळी कर्जत–खालापूरचे आमदार महेंद्र थोरवे, खालापूरचे तहसीलदार तथा तालुका आपत्ती व्यवस्थापन प्राधिकरणाचे अध्यक्ष अभय चव्हाण, नायब तहसीलदार सुधाकर राठोड, पंचायत समिती सदस्य रघुनाथ शिंदे, खोपोली नगरपालिकेचे नगराध्यक्ष कुलदीप शेंडे तसेच विविध विभागांचे अधिकारी, लोकप्रतिनिधी आणि मान्यवर उपस्थित होते.

यावेळी उपस्थितांनी अमन मुजावर यांच्या सेवाभावी वृत्तीला अभिवादन करत कुटुंबीयांचे सांत्वन केले. आपत्तीच्या काळात समाजासाठी निस्वार्थपणे कार्य करणाऱ्या स्वयंसेवकांच्या योगदानाची शासनाकडून दखल घेतली जात असल्याचे या मदतीतून अधोरेखित झाल्याची भावना उपस्थितांनी व्यक्त केली.

---------------

हिंदुस्थान समाचार / संदेश साळुंके (रायगड)