ओरडोस (चीन)/ नवी दिल्ली, 10 जुलै (हिं.स.)। आशियाई अंडर-23 एथलेटिक्स चॅंपियनशिप 2026 मध्ये भारताने शानदार सुरुवात करत गुरुवारी पहिल्याच दिवशी एक सुवर्ण, एक रौप्य आणि तीन कांस्य अशी एकूण पाच पदके आपल्या नावावर केली. भारताचे एकमेव सुवर्णपदक मिश्र 4x400 मीटर रिले संघाने जिंकले.आस्तिक प्रधान, सॅंड्रा मोल साबू, सेतु मिश्रा आणि श्रावणी सचिन सांगले या भारतीय चौकडीने 3:18.64 सेकंदांची वेळ नोंदवत सुवर्णपदक पटकावले. हा भारतासाठी दिवसातील अखेरचा स्पर्धात्मक प्रकार होता.

भारताला पहिले पदक भरतप्रीत सिंह यांनी मिळवून दिले. त्यांनी पुरुष डिस्कस थ्रोमध्ये 52.91 मीटरच्या सर्वोत्तम प्रयत्नासह कांस्यपदक जिंकले. चीनच्या ली झिक्सिन यांनी 60.79 मीटरसह सुवर्ण, तर त्यांच्याच देशातील जियांग जेहाओ यांनी 59.60 मीटरसह रौप्यपदक जिंकले. पुरुषांच्या 5000 मीटर शर्यतीत भारताने दोन पदके मिळवली. शिवाजी परशुराम मदप्पागौडा यांनी 14:08.19 मिनिटांच्या वेळेसह रौप्यपदक जिंकले, तर विनोद सिंह यांनी 14:23.67 मिनिटांत शर्यत पूर्ण करत कांस्यपदक आपल्या नावावर केले. जपानच्या रुई सुझुकी यांनी 14:01.24 मिनिटांच्या वेळेसह सुवर्णपदक जिंकले.

दिवसातील पाचवे पदक प्राची देवकर यांनी महिलांच्या 3000 मीटर स्टीपलचेस स्पर्धेत जिंकले. त्यांनी 10:32.69 मिनिटांची वेळ नोंदवत कांस्यपदक मिळवले. या स्पर्धेत चीनच्या यांग यीतिंग यांनी 10:14.68 मिनिटांच्या वेळेसह सुवर्ण, तर लियू युक्सिन यांनी 10:25.51 मिनिटांच्या वेळेसह रौप्यपदक जिंकले. आशियाई अंडर-23 एथलेटिक्स चॅंपियनशिप स्पर्धेच्या पहिल्या आवृत्तीत भारताकडून 53 खेळाडू सहभागी झाले आहेत. पहिल्याच दिवसाच्या कामगिरीसह भारतीय संघाने स्पर्धेत दमदार सुरुवात केली आहे.

---------------

हिंदुस्थान समाचार / Suraj Chaugule