मुंबई, 12 जुलै (हिं.स.)। जुलै महिना भारतीय स्मार्टफोन बाजारासाठी अत्यंत महत्त्वाचा ठरणार आहे. या महिन्यात मोटोरोला, रिअलमी, विवो, टेक्नो, सॅमसंग आणि आयक्यूओओ यांसारख्या आघाडीच्या कंपन्या आपले नवीन स्मार्टफोन लॉन्च करण्यासाठी सज्ज आहेत. बजेट, मिड-रेंज आणि प्रीमियम सेगमेंटमधील ग्राहकांसाठी विविध पर्याय उपलब्ध होणार असून, मोठी बॅटरी, दमदार परफॉर्मन्स, आकर्षक डिझाइन, हाय रिफ्रेश रेट डिस्प्ले आणि प्रगत एआय फीचर्स ही या फोनची प्रमुख वैशिष्ट्ये असतील.
मोटोरोलाचा एज ७० मॅक्स हा स्मार्टफोन १५ जुलै रोजी दुपारी १२ वाजता भारतात लॉन्च होणार आहे. या फोनमध्ये फ्लॅट डिस्प्ले, स्लिम बेझल्स आणि चौकोनी रिअर कॅमेरा मॉड्यूल देण्यात आले आहे. लाइट ब्लू आणि ग्रीन अशा दोन रंगांमध्ये हा फोन उपलब्ध होईल. यात क्वालकॉम स्नॅपड्रॅगन ८ जेन ५ प्रोसेसर, १२ जीबीपर्यंत एलपीडीडीआर५एक्स रॅम, ऑन-डिव्हाइस एआय प्रोसेसिंग, क्वाड एचडी प्लस एलटीपीओ डिस्प्ले, १४४ हर्ट्झ रिफ्रेश रेट आणि ७ हजार निट्स पीक ब्राइटनेस मिळणार आहे. गेमिंगसाठीही हा फोन विशेष सक्षम असल्याचा दावा कंपनीने केला आहे.
रिअलमीचा नार्झो १००एक्स हाही १५ जुलै रोजी लॉन्च होणार असून त्याची किंमत १५ ते २० हजार रुपयांच्या दरम्यान असण्याची शक्यता आहे. या फोनचे सर्वात मोठे आकर्षण म्हणजे ८ हजार एमएएच क्षमतेची बॅटरी. ४५ वॅट फास्ट चार्जिंग, रिव्हर्स चार्जिंग, डिमेन्सिटी ६३०० प्रोसेसर, १४४ हर्ट्झ डिस्प्ले, ५० मेगापिक्सेल कॅमेरा, २५६ जीबी स्टोरेज आणि एआय पल्स लाईटसारखी वैशिष्ट्ये यात मिळतील. आयपी६५ रेटिंग आणि मिलिटरी ग्रेड टिकाऊपणामुळे हा फोन अधिक मजबूत बनवण्यात आला आहे.
विवोचा टी५ लाईट हा स्मार्टफोन १६ जुलै रोजी लॉन्च होणार आहे. ६ हजार ५०० एमएएच बॅटरी, ४४ वॅट फास्ट चार्जिंग, १२० हर्ट्झ डिस्प्ले, डिमेन्सिटी ६३०० चिपसेट आणि ओरिजिन ओएस ६ यामुळे हा फोन बजेट ग्राहकांसाठी आकर्षक पर्याय ठरणार आहे. एआय क्रिएशन, एआय कॅप्शन्स आणि एआय ट्रान्सक्रिप्ट असिस्ट यांसारखी स्मार्ट फीचर्सही यात देण्यात आली आहेत.
टेक्नोचा कॅमॉन ५० अल्ट्रा फाईव्ह जी १७ जुलै रोजी लॉन्च होणार असून फोटोग्राफी आणि कंटेंट क्रिएटर्सना लक्षात घेऊन त्याची रचना करण्यात आली आहे. मल्टी कॅमेरा सेटअप, डॉल्बी अॅटमॉस ऑडिओ, मोठी बॅटरी, एआय फोटो एन्हान्समेंट आणि ऑब्जेक्ट रिमूव्हल यांसारखी आधुनिक सुविधा या फोनमध्ये उपलब्ध असतील.
दरम्यान, सॅमसंगचा गॅलेक्सी अनपॅक्ड २०२६ कार्यक्रम २२ जुलै रोजी लंडनमध्ये होणार असून गॅलेक्सी झेड फोल्ड ८, झेड फ्लिप ८ आणि झेड फोल्ड ८ अल्ट्रा हे प्रीमियम फोल्डेबल स्मार्टफोन सादर होण्याची शक्यता आहे. अधिक स्लिम डिझाइन, सुधारित हिंज, ट्रिपल रिअर कॅमेरा, जलद चार्जिंग आणि गॅलेक्सी एआय फीचर्स ही या मालिकेची प्रमुख वैशिष्ट्ये असतील. भारतात या फोनचे प्री-रिझर्व्हेशनही सुरू झाले असून फोल्ड ८ अल्ट्राची किंमत जवळपास दोन लाख रुपयांपासून सुरू होण्याची शक्यता आहे.
याशिवाय आयक्यूओओचा झेड११ लाईट २४ जुलै रोजी लॉन्च होणार आहे. या फोनमध्ये डिमेन्सिटी ६३०० फाईव्ह जी प्रोसेसर, ६ हजार ५०० एमएएच बॅटरी, ४४ वॅट चार्जिंग, १२० हर्ट्झ डिस्प्ले आणि डायनॅमिक लाईट नोटिफिकेशन फीचर मिळणार आहे. एआय टूल्ससह हा फोन दैनंदिन वापरासाठी सक्षम पर्याय ठरेल.
एकूणच, जुलै महिन्यातील या स्मार्टफोन लॉन्चमुळे भारतीय बाजारात स्पर्धा अधिक तीव्र होणार असून ग्राहकांना अत्याधुनिक एआय फीचर्स, दमदार परफॉर्मन्स, मोठी बॅटरी, उत्कृष्ट डिस्प्ले आणि प्रीमियम डिझाइन असलेले अनेक नवे स्मार्टफोन निवडण्यासाठी उपलब्ध होणार आहेत.
---------------
हिंदुस्थान समाचार / Suraj Chaugule
