मुंबई, 12 जुलै (हिं.स.)। इंडिया यामाहा मोटरने भारतातील पर्यावरणपूरक वाहतूक आणि स्वच्छ इंधन वापराला चालना देण्यासाठी नवी एफझेड ब्लू फ्लेक्स मोटरसायकल बाजारात लाँच केली आहे. दिल्लीतील एक्स-शोरूम किंमत १ लाख २४ हजार २४० रुपये ठेवण्यात आली असून ही यामाहाची पहिली फ्लेक्स-फ्युअल मोटरसायकल आहे. विशेष म्हणजे ही मोटरसायकल ई-२० ते ई-८५ पर्यंतच्या इथेनॉल-मिश्रित इंधनावर सहज चालू शकते. त्यामुळे भारत सरकारच्या इथेनॉल मिश्रण धोरणाला बळ मिळण्याबरोबरच जीवाश्म इंधनावरील अवलंबित्व कमी करण्याच्या दिशेनेही हे महत्त्वाचे पाऊल मानले जात आहे.
या मोटरसायकलमध्ये १४९ सीसी क्षमतेचे सिंगल-सिलेंडर, एअर-कूल्ड आणि फ्यूल-इंजेक्शन तंत्रज्ञानावर आधारित पेट्रोल इंजिन देण्यात आले आहे. हे इंजिन विशेषतः जास्त प्रमाणातील इथेनॉल-मिश्रित इंधनावर सुरळीत काम करण्यासाठी विकसित करण्यात आले आहे. इंजिन ७,२५० आरपीएमवर ११.७ बीएचपी शक्ती आणि ६,००० आरपीएमवर १२.८ न्यूटन मीटर टॉर्क निर्माण करते. यासोबत पाच-स्पीड गिअरबॉक्स देण्यात आला असून दैनंदिन वापरात कार्यक्षम कामगिरी आणि चांगली इंधन कार्यक्षमता मिळेल, असा कंपनीचा दावा आहे.
यामाहा मोटर इंडियाचे ग्रुप चेअरमन हजिमे आओता यांनी सांगितले की, कार्बन न्यूट्रॅलिटीचे उद्दिष्ट साध्य करण्यासाठी केवळ एका तंत्रज्ञानावर अवलंबून राहणे पुरेसे नाही. त्यासाठी बहुपथीय दृष्टिकोन आवश्यक आहे. ब्लू फ्लेक्स तंत्रज्ञान भारतातील विकसित होत असलेल्या बायोफ्युअल धोरणाशी सुसंगत असून कंपनीच्या जागतिक शाश्वत विकासाच्या उद्दिष्टांना पूरक आहे. कंपनी इलेक्ट्रिक मोबिलिटीसह विविध तंत्रज्ञानांचा वापर करून कार्बन उत्सर्जन कमी करण्यासाठी सातत्याने प्रयत्न करत असल्याचेही त्यांनी स्पष्ट केले.
डिझाइनच्या बाबतीत एफझेड ब्लू फ्लेक्समध्ये स्टँडर्ड एफझेड मालिकेचीच आकर्षक शैली कायम ठेवण्यात आली आहे. मोटरसायकलमध्ये फुल एलईडी प्रोजेक्टर हेडलॅम्प, इंटिग्रेटेड पोझिशन लॅम्प, दमदार फ्यूल टँक, एरोडायनॅमिक एक्स्टेन्शन्स, फॉक्स एअर व्हेंट्स, कॉम्पॅक्ट एक्झॉस्ट, सिंगल-पीस सीट आणि एलईडी टेल लॅम्प देण्यात आले आहेत. सस्पेन्शनसाठी पुढील बाजूस टेलिस्कोपिक फ्रंट फोर्क्स आणि मागील बाजूस स्विंगआर्म देण्यात आला आहे. सुरक्षिततेसाठी एबीएस ब्रेकिंग प्रणालीचा समावेश करण्यात आला असून त्यामुळे अधिक विश्वासार्ह ब्रेकिंगचा अनुभव मिळतो. ही मोटरसायकल सध्या केवळ मेटॅलिक ब्लॅक रंगात उपलब्ध आहे.
एफझेड ब्लू फ्लेक्सची विक्री दिल्ली, उत्तर प्रदेश, महाराष्ट्र, कर्नाटक, तेलंगणा आणि तामिळनाडू या राज्यांतील निवडक यामाहा ब्लू स्क्वेअर डिलरशिपमधून करण्यात येणार आहे. देशात इथेनॉल मिश्रित इंधनाचा वापर वाढत असताना ही फ्लेक्स-फ्युअल मोटरसायकल ग्राहकांसाठी पर्यावरणपूरक आणि भविष्यातील इंधन पर्याय उपलब्ध करून देणारी ठरणार आहे. ८५ टक्क्यांपर्यंत इथेनॉलयुक्त इंधन वापरण्याची क्षमता असल्याने प्रदूषण कमी होण्यास मदत होईल आणि हरित वाहतुकीच्या दिशेने भारताची वाटचाल अधिक वेगाने होण्याची अपेक्षा व्यक्त केली जात आहे.
---------------
हिंदुस्थान समाचार / Suraj Chaugule
