लंडन, 12 जुलै (हिं.स.)विम्बल्डन २०२६ चे महिला एकेरी विजेतेपद पटकावणाऱ्या २१ वर्षीय चेक टेनिस स्टार लिंडा नोस्कोव्हाने आपल्या कारकिर्दीतील पहिले ग्रँडस्लॅम जिंकले. चेक टेनिसपटूंमधील अंतिम सामन्यात, नोस्कोव्हाने कॅरोलिना मुचोव्हाचा ६-२, ५-७, ६-३ असा पराभव करून प्रतिष्ठित 'व्हीनस रोझवॉटर डिश' जिंकली. नोस्कोव्हाने पहिल्या सेटमध्ये उत्कृष्ट खेळ करत सहज आघाडी घेतली. दुसऱ्या सेटमध्ये ती विजयापासून केवळ एक पाऊल दूर असली तरी, तिने पाच मॅच पॉईंट्स गमावले, ज्यामुळे सामना तिसऱ्या सेटमध्ये गेला. असे असूनही, तिने एक उल्लेखनीय पुनरागमन करत निर्णायक सेट ६-३ ने जिंकला आणि आपले पहिले ग्रँड स्लॅम विजेतेपद निश्चित केले.

लिंडा नोस्कोव्हा गेल्या चार वर्षांत विम्बल्डन महिला एकेरी विजेतेपद जिंकणारी तिसरी चेक टेनिसपटू ठरली आहे. यापूर्वी, मार्केटा वोंद्रोसोवाने २०२३ मध्ये आणि बार्बोरा क्रेजकोवाने २०२४ मध्ये हे प्रतिष्ठित विजेतेपद पटकावले होते. या विजयाने चेक महिला टेनिसचे वर्चस्व पुन्हा एकदा सिद्ध केले.

दोन वेळा विम्बल्डन चॅम्पियन ठरलेली पेट्रा क्विटोवा आणि विक्रमी नऊ विम्बल्डन एकेरी विजेतेपदे पटकावणारी दिग्गज मार्टिना नवरातिलोवा यादेखील अंतिम सामन्यादरम्यान उपस्थित होत्या. नवरातिलोवा प्रिन्सेस ऑफ वेल्स, केट यांच्यासोबत रॉयल बॉक्समध्ये बसल्या होत्या. सामन्यानंतर, प्रिन्सेस ऑफ वेल्स यांनी नोस्कोवाला विजेतेपदाची ट्रॉफी प्रदान केली.

विशेष म्हणजे, लिंडा नोस्कोवा आणि कॅरोलिना मुचोवा यांनी २०२४ च्या पॅरिस ऑलिम्पिकमध्ये महिला दुहेरीच्या स्पर्धेत एकत्र भाग घेतला होता. त्या स्पर्धेत ही जोडी चौथ्या स्थानावर राहिली होती. यावेळी, त्या विम्बल्डनच्या अंतिम सामन्यात एकमेकींसमोर उभ्या ठाकल्या, ज्यात नोस्कोवाने विजय मिळवला.

---------------

हिंदुस्थान समाचार / वृषाली देशपांडे