इंग्लंड, 12 जुलै, (हिं.स.) ब्रेंडन मॅक्युलम इंग्लंडच्या कसोटी संघाच्या मुख्य प्रशिक्षकपदावरून पायउतार होणार आहेत. इंग्लंड आणि वेल्स क्रिकेट बोर्डाने याला दुजोरा दिला आहे. पण, ते 'व्हाईट-बॉल' संघांचे नेतृत्व करणे सुरूच ठेवतील, असेही स्पष्ट करण्यात आले आहे.

कसोटी संघाचे प्रशिक्षकपद भूषवणे मला खूप आवडले आणि आम्ही मिळून जी कामगिरी केली, त्याचा मला प्रचंड अभिमान वाटतो. या प्रवासात काही अविश्वसनीय यश आणि काही कठीण दिवसही आले, पण अशा आव्हानाचा स्वीकार करताना हे सर्व घडणे स्वाभाविक आहे. ही माझ्यासाठी एक सन्मानाची आणि अभिमानाची गोष्ट होती आणि मी त्याबद्दल कृतज्ञ आहे. क्रिकेटपटू, कर्मचारी आणि ज्या चाहत्यांनी या प्रवासात आम्हाला साथ दिली, त्या सर्वांचा मी ऋणी आहे, असे मॅक्युलम यांनी म्हटले आहे.

अर्थात, हे काम पुढे चालू ठेवता येणार नाही याचे मला दुःख आहे, पण मी या निर्णयाचा आदर करतो. आता माझे संपूर्ण लक्ष 'व्हाईट-बॉल' संघांना सर्वोत्तम योगदान देण्यावर आणि इंग्लंडला प्रगतीपथावर नेण्यास मदत करण्यावर असेल. कसोटी संघाला माझ्याकडून यशासाठी खूप खूप शुभेच्छा. त्या ड्रेसिंग रूममध्ये प्रचंड गुणवत्ता आहे आणि ते सर्वजण खूप खास खेळाडू आहेत. मी नेहमीच आनंदाने या मुलांच्या पाठीशी उभा राहीन आणि ते खेळाला अशाच आक्रमकतेने पुढे नेत राहतील अशी आशा बाळगेन. मला खात्री आहे की ते देशाला अभिमान वाटेल अशी कामगिरी करत राहतील, असेही त्यांनी नमूद केले.

न्यूझीलंडविरुद्धची मालिका गमावल्यानंतर दोन आठवड्यांनी ही घोषणा करण्यात आली आहे. २०१२ नंतर तीन किंवा त्याहून अधिक कसोटी सामन्यांच्या मायदेशातील मालिकेत इंग्लंडचा हा पहिलाच पराभव होता. त्याआधी ऑस्ट्रेलियात झालेल्या ॲशेस मालिकेत इंग्लंडला ४-१ असा पराभव स्वीकारावा लागला होता. आणि व्यावसायिकतेचा अभाव असल्याच्या कारणावरून संघावर टीका झाली होती.

न्यूझीलंड मालिकेपाठोपाठ गेल्या महिन्यात बेन स्टोक्सने आंतरराष्ट्रीय क्रिकेटमधून निवृत्ती घेतली आणि आता मॅक्युलम पायउतार होत आहेत. या घडामोडींमुळे इंग्लंडमधील कसोटी क्रिकेटच्या 'बॅझबॉल' युगाचा अंत झाल्याचे संकेत मिळत आहेत.

इंग्लंडची पुढील कसोटी मालिका पाकिस्तानविरुद्ध असून ती पुढच्या महिन्यात सुरू होणार आहे. मॅक्युलम यांनी जानेवारी २०२५ पासून 'व्हाईट-बॉल' आणि 'रेड-बॉल' (कसोटी) अशा दोन्ही प्रकारच्या संघांच्या प्रशिक्षकपदाची जबाबदारी एकत्रितपणे सांभाळली आहे. इंग्लंडच्या टी-२० संघाने नुकत्याच मायदेशात झालेल्या मालिकेत भारताचा ४-० असा धुव्वा उडवला असून, ते जगात पहिल्या क्रमांकावर पोहोचले आहेत.

---------------

हिंदुस्थान समाचार / वृषाली देशपांडे