लंडन, 13 जुलै (हिं.स.)भारतीय क्रिकेटचा उदयोन्मुख क्रिकेटपटू १५ वर्षीय वैभव सूर्यवंशीने पहिल्यांदाच विम्बल्डनच्या ऐतिहासिक सेंटर कोर्टला भेट देऊन एक अविस्मरणीय अनुभव घेतला. माजी दिग्गज अष्टपैलू युवराज सिंग आणि भारतीय टी-२० संघाचे खेळाडू अभिषेक शर्मा व संजू सॅमसन वैभवसोबत उपस्थित होते. भारतीय क्रिकेटचा नवा तारा, वैभव, प्रतिष्ठित ऑल इंग्लंड क्लबच्या वातावरणाचा आनंद घेताना दिसला.

वैभवने या ऐतिहासिक क्रीडांगणाला पहिल्यांदाच भेट देण्याचा आपला अनुभव सांगितला. मी विम्बल्डन पुरुष एकेरीचा अंतिम सामना पाहण्यासाठी आलो होतो, असे वैभवने जिओ स्टारला सांगितले. थेट टेनिस सामना पाहण्याचा अनुभव कसा असतो आणि अंतिम सामन्याच्या प्रचंड दबावाखाली खेळाडू कशी कामगिरी करतात, हे मला पाहायचे होते. माझ्यासाठी हा एक उत्तम अनुभव होता.

टेनिसमधील आपली आवड उघड करताना, या तरुण क्रिकेटपटूने सांगितले की तो गेल्या चार-पाच वर्षांपासून या खेळावर बारकाईने लक्ष ठेवून आहे. त्याने राफेल नदाल आणि नोव्हाक जोकोविच यांची आपले आवडते खेळाडू म्हणून नावे घेतली, ज्यांना तो लहानपणापासून पाहत आला आहे. वैभव म्हणाला, मी नदाल आणि जोकोविच यांना खूप पाहायचो. मला जोकोविच खूप आवडतो, पण हे दोघे असे खेळाडू आहेत ज्यांना मी सर्वात जास्त फॉलो करायचो.

या वर्षी विम्बल्डनमध्ये भारतीय क्रिकेटपटूंची मोठी उपस्थिती पाहायला मिळाली. वैभवच्या आधी, महान फलंदाज सचिन तेंडुलकर आणि भारताचा एकदिवसीय आणि कसोटी कर्णधार शुभमन गिल यांनीही पुरुष एकेरीची उपांत्य फेरी पाहण्यासाठी प्रतिष्ठित रॉयल बॉक्सला भेट दिली होती. सचिनचा आवडता क्रीडा प्रकार विम्बल्डन असला तरी, शुभमन गिलचा हा पहिलाच विम्बल्डनचा अनुभव होता. सेंटर कोर्टवर तरुण पिढीने सर्वांचे लक्ष वेधून घेतले. वैभवने अलीकडेच इंग्लंडविरुद्धच्या पाच सामन्यांच्या टी-२० मालिकेत भाग घेतला होता. मालिका संपल्यानंतर, वैभवने अभिषेक शर्मा आणि संजू सॅमसन यांच्यासोबत अंतिम सामन्याचा आनंद घेतला, जिथे युवराजही उपस्थित होता.

---------------

हिंदुस्थान समाचार / वृषाली देशपांडे