लंडन, 13 जुलै (हिं.स.)भारतीय महिला क्रिकेट संघाची यष्टीरक्षक-फलंदाज यास्तिका भाटियाने क्रिकेटची मक्का मानल्या जाणाऱ्या लॉर्ड्स क्रिकेट मैदानावर इतिहास रचला. इंग्लंडविरुद्धच्या एकमेव कसोटी सामन्यात यास्तिकाने एक शानदार शतक झळकावले आणि लॉर्ड्सवर कसोटी शतक करणारी ती पहिली महिला क्रिकेटपटू ठरली. हे यास्तिकाच्या आंतरराष्ट्रीय कारकिर्दीतील पहिले कसोटी शतक होते. तिने १२ शानदार चौकारांसह १४५ चेंडूंमध्ये आपले शतक पूर्ण केले. या अविस्मरणीय खेळीने तिने लॉर्ड्सच्या प्रतिष्ठित सन्मान फलकावर आपले नाव कोरले.

यास्तिकाला तिच्या या खेळीमध्ये नशिबाची साथही मिळाली. इंग्लंडची वेगवान गोलंदाज लॉरेन बेलच्या पहिल्याच चेंडूने तिचा ऑफ स्टंप उडवला, पण बेल्स उडाल्या नाहीत. मिळालेल्या या संधीचा पुरेपूर फायदा घेत, यास्तिकाने संयम आणि आक्रमकतेचा उत्तम मिलाफ दाखवत, विशेषतः सरळ आणि कव्हर क्षेत्रात शानदार फटकेबाजी केली.

बडोदा येथील रहिवासी असलेल्या यास्तिका भाटियाला अलीकडेच अँटेरिअर क्रुशिएट लिगामेंटची गंभीर दुखापत झाली होती. या दुखापतीमुळे ती बराच काळ क्रिकेटपासून दूर राहिली. इंग्लंड दौऱ्यादरम्यान आंतरराष्ट्रीय क्रिकेटमध्ये पुनरागमन केल्यानंतर, तिने लॉर्ड्सवर ऐतिहासिक शतक झळकावून जोरदार पुनरागमन केले.

या सामन्यातील भारतीय क्रिकेटपटू क्रांती गौडनेही लॉर्ड्स ऑनर्स बोर्डवर आपले स्थान मिळवले आहे. तिने उत्कृष्ट गोलंदाजी करत पहिल्या डावात पाच बळी घेतले होते. आता यास्तिकाच्या शतकामुळे, या कसोटीत दोन भारतीय क्रिकेटपटूंनी ऑनर्स बोर्डवर आपली नावे नोंदवली आहेत.

---------------

हिंदुस्थान समाचार / वृषाली देशपांडे