मुंबई, 14 जुलै (हिं.स.)। स्वदेशी दुचाकी वाहन निर्माता हीरो मोटोकॉर्पच्या इलेक्ट्रिक मोबिलिटी ब्रँड विदाने भारतीय बाजारात आपल्या व्हीएक्स२ प्लस इलेक्ट्रिक स्कूटरचे नवीन ४.४ किलोवॅट-तास बॅटरी व्हर्जन लॉन्च केले आहे. कंपनीने या नव्या मॉडेलची एक्स-शोरूम किंमत १.४४ लाख रुपये ठेवली असून, हे व्हर्जन सध्याच्या ३.४ किलोवॅट-तास मॉडेलपेक्षा वरच्या श्रेणीत स्थान देण्यात आले आहे. विशेष म्हणजे या नवीन स्कूटरच्या डिझाइनमध्ये किंवा फीचर्समध्ये कोणताही बदल करण्यात आलेला नाही. मात्र, अधिक क्षमतेच्या बॅटरीमुळे याची रेंज आणि टॉप स्पीड या दोन्हीमध्ये लक्षणीय वाढ करण्यात आली आहे.

या नवीन व्हर्जनमध्ये एकूण ४.४ किलोवॅट-तास क्षमतेचा बॅटरी पॅक देण्यात आला आहे. हा दोन काढता येणाऱ्या २.२ किलोवॅट-तास बॅटरी पॅकमध्ये विभागलेला आहे. कंपनीच्या दाव्यानुसार, ही स्कूटर पूर्ण चार्ज केल्यानंतर आयडीसी प्रमाणित १८७ किलोमीटरपर्यंत धावू शकते. त्यामुळे व्हीएक्स२ प्लस मालिकेतील सर्वाधिक रेंज देणारे हे मॉडेल ठरले आहे.

तुलना केल्यास, ३.४ किलोवॅट-तास बॅटरी असलेले व्हर्जन एका चार्जमध्ये १४६ किलोमीटरपर्यंत रेंज देते, तर २.२ किलोवॅट-तास क्षमतेचे बेस व्हर्जन ९३ किलोमीटरपर्यंत धावते. त्यामुळे अधिक अंतराचा प्रवास करणाऱ्या ग्राहकांसाठी नवीन ४.४ किलोवॅट-तास व्हर्जन अधिक उपयुक्त पर्याय ठरण्याची शक्यता आहे.

या स्कूटरमध्ये पूर्वीप्रमाणेच ६ किलोवॅट पीक पॉवर निर्माण करणारी इलेक्ट्रिक मोटार देण्यात आली आहे. ही मोटार सुमारे ८.०४ बीएचपी शक्ती आणि २६ न्यूटन-मीटर टॉर्क निर्माण करते. मात्र, मोठ्या बॅटरी पॅकमुळे या व्हर्जनची टॉप स्पीड आता ९० किलोमीटर प्रतितास झाली आहे. याआधीच्या ३.४ किलोवॅट-तास व्हर्जनची टॉप स्पीड ८० किलोमीटर प्रतितास होती. म्हणजेच नवीन मॉडेलमध्ये तब्बल १० किलोमीटर प्रतितास अधिक वेग मिळतो.

रायडिंगचा अनुभव अधिक चांगला करण्यासाठी स्कूटरमध्ये इको, रायड आणि स्पोर्ट असे तीन रायड मोड देण्यात आले आहेत. याशिवाय बूस्ट फंक्शनची सुविधाही उपलब्ध असून, गरजेनुसार अतिरिक्त वेग आणि त्वरण मिळण्यास मदत होते. फीचर्सच्या बाबतीतही ही स्कूटर आधुनिक तंत्रज्ञानाने सुसज्ज आहे. यात ४.३ इंचांचा टीएफटी डिस्प्ले, स्मार्टफोन कनेक्टिव्हिटी, टर्न-बाय-टर्न नेव्हिगेशन तसेच ओव्हर-द-एअर सॉफ्टवेअर अपडेट्स यांसारख्या सुविधा देण्यात आल्या आहेत. अधिक रेंज, वाढलेली टॉप स्पीड आणि अत्याधुनिक तंत्रज्ञानामुळे विदा व्हीएक्स२ प्लसचे हे नवीन व्हर्जन भारतीय इलेक्ट्रिक स्कूटर बाजारात ग्राहकांचे लक्ष वेधून घेण्याची शक्यता व्यक्त केली जात आहे.

---------------

हिंदुस्थान समाचार / Suraj Chaugule