नवी दिल्ली, १५ जुलै (हिं.स.) : काँग्रेस पक्षाने केंद्र सरकारवर आपली आर्थिक धोरणे राबवण्यात अपयशी ठरल्याचा आणि सतत वाढणाऱ्या महागाई दरामुळे देशाला गंभीर आर्थिक संकटात ढकलल्याचा आरोप केला आहे. पक्षाने म्हटले आहे की, अर्थव्यवस्थेचे सर्व मूलभूत निर्देशक धोक्याच्या पातळीवर असताना, सरकार जनतेचे लक्ष विचलित करण्यात आणि आकडेवारी लपवण्यात व्यस्त आहे.

बुधवारी, एका वृत्तपत्रात प्रसिद्ध झालेल्या लेखाचा हवाला देत जयराम रमेश यांनी लिहिले की, गेल्या ४४ महिन्यांतील सर्वाधिक घाऊक महागाई (९.८७%) नोंदवली गेली आहे, इंधन आणि विजेच्या दरात २७.४% वाढ झाली आहे, आणि कृषी पेरणी गेल्या तीन वर्षांतील विक्रमी नीचांकी पातळीवर पोहोचली आहे. सामान्य जनता महागाई आणि बेरोजगारीने त्रस्त आहे, तर शेतकरी सरकारच्या चुकीच्या धोरणांचा आणि खराब हवामानाचा दुहेरी फटका सहन करत आहेत.

रमेश यांनी असा आरोप केला की, वाढत्या महागाईमुळे उद्योगांचा खर्चही वाढला आहे आणि त्यावर नियंत्रण ठेवण्याऐवजी सरकार ही चिंताजनक आकडेवारी लपवण्याचा प्रयत्न करत आहे. ते म्हणाले की, घाऊक महागाईची ताजी आकडेवारी हे सरकारच्या आर्थिक गैरव्यवस्थापनाचे आणि अपयशाचे उदाहरण आहे. ते म्हणाले की, जेव्हा देशातील प्रत्येक घटक त्रस्त आहे, तेव्हा सरकारचा प्राधान्यक्रमच भरकटला आहे. सत्तेत १२ वर्षे राहिल्यानंतर केंद्र सरकारने या आर्थिक अपयशाबद्दल उत्तर दिलेच पाहिजे.

---------------

हिंदुस्थान समाचार / वृषाली देशपांडे