नवी दिल्ली, १८ जुलै (हिं.स.) : पंतप्रधान नरेंद्र मोदी यांनी भारताच्या पहिल्या खाजगी कक्षीय रॉकेट 'विक्रम-१' च्या यशस्वी प्रक्षेपणाबद्दल स्कायरूट एरोस्पेसचे अभिनंदन केले. कंपनीचे सह-संस्थापक पवन कुमार चंदना आणि नागा भरत डाका यांच्याशी फोनवर बोलताना ते म्हणाले की, स्कायरूटने आकाशात आपली मुळे रोवली आहेत आणि ती अधिक मजबूत करून देशातील तरुणांना प्रेरणा दिली आहे.
शनिवारी, हैदराबादस्थित खाजगी कंपनी स्कायरूट एरोस्पेसने विकसित केलेल्या देशातील पहिल्या कक्षीय-श्रेणीच्या रॉकेट 'विक्रम-१' च्या यशस्वी प्रक्षेपणानंतर इस्रोच्या कार्यालयात कंपनीचे सह-संस्थापक पवन कुमार चंदना यांच्याशी बोलताना पंतप्रधानांनी याला आत्मनिर्भर भारताच्या दिशेने एक मोठे पाऊल म्हटले. पंतप्रधान म्हणाले की, या यशाने हे सिद्ध केले आहे की भारत खाजगी क्षेत्राच्या सहभागानेही अंतराळ क्षेत्रात आत्मनिर्भर बनण्यास सक्षम आहे.
पंतप्रधान म्हणाले की, स्कायरूटच्या तरुण टीमने आपल्या वचनबद्धतेने आणि कठोर परिश्रमाने भारतमातेचा गौरव नव्या उंचीवर नेला आहे. त्यांनी याची तुलना 'वंदे मातरम मिशन'शी केली आणि सांगितले की, यामुळे नवीन पिढीला तंत्रज्ञानाचे फायदे मिळतील आणि भावी पिढ्यांना प्रेरणा मिळेल. त्यांनी स्कायरूट टीमला लवकरच भेटण्याचे निमंत्रणही दिले.पंतप्रधान म्हणाले की, एक काळ असा होता जेव्हा आत्मनिर्भर भारताच्या माझ्या भाषणाकडे दुर्लक्ष करणारे लोक माझी खिल्ली उडवत असत. आज तुम्ही सिद्ध केले आहे की आपण या क्षेत्रातही आत्मनिर्भर होण्यास सक्षम आहोत. तुम्ही ती क्षमता दाखवून दिली आहे.
पवन कुमार चंदना म्हणाले की, भारतात पहिल्यांदाच एका खाजगी कंपनीने कक्षीय रॉकेट यशस्वीरित्या प्रक्षेपित केले आहे. ही कामगिरी संपूर्ण टीमच्या कठोर परिश्रमाचे फळ आहे आणि केवळ सरकारने खाजगी क्षेत्राला दिलेल्या संधीमुळेच हे शक्य झाले. यासाठी त्यांनी पंतप्रधानांचे आभार मानले.'विक्रम-१' रॉकेटला भारतीय अंतराळ कार्यक्रमाचे जनक डॉ. विक्रम साराभाई यांच्या सन्मानार्थ नाव देण्यात आले आहे. हे हैदराबादस्थित स्कायरूट एरोस्पेसने विकसित केले आहे. या मोहिमेला ‘मिशन आगमन’ असे नाव देण्यात आले आहे.
---------------
हिंदुस्थान समाचार / वृषाली देशपांडे
