नवी दिल्ली, 18 जुलै (हिं.स.)क्रिकेट जगताने आपला एक महान क्रिकेटपटू गमावला आहे. वेस्ट इंडिजचे अष्टपैलू क्रिकेटपटू सर गार्फिल्ड सोबर्स यांचे वयाच्या ८९ व्या वर्षी निधन झाले. २८ जुलै रोजी त्यांचा ९० वा वाढदिवस असता, पण त्या तारखेपूर्वीच त्यांचे निधन झाले. क्रिकेट वेस्ट इंडिजनेही एका सोशल मीडिया पोस्टद्वारे सोबर्स यांना श्रद्धांजली वाहिली. सर गार्फिल्ड सोबर्स हे सर गॅरी सोबर्स या नावानेही ओळखले जात होते.
सोबर्स यांना क्रिकेटच्या इतिहासातील सर्वात परिपूर्ण क्रिकेटपटूंपैकी एक मानले जाते. त्यांनी फलंदाजी, गोलंदाजी आणि क्षेत्ररक्षण या तिन्ही विभागांमध्ये एक असा दर्जा प्रस्थापित केला, जो आजही आदर्शवत आहे. सोबर्स अशा काळात क्रिकेट खेळले, जेव्हा वेस्ट इंडिजला जागतिक क्रिकेटमधील सर्वात बलाढ्य संघांपैकी एक मानले जात होते. त्यांच्या अष्टपैलू कामगिरीमुळे या खेळातील महान क्रिकेटपटूंमध्ये त्यांचे स्थान कायमचे पक्के झाले आहे.
सर गॅरी सोबर्स यांनी वेस्ट इंडिजचे कर्णधारपदही भूषवले आणि कॅरिबियन तसेच जगभरातील क्रिकेटपटूंच्या अनेक पिढ्यांना प्रेरणा दिली. क्रिकेटमधील त्यांच्या अतुलनीय योगदानाबद्दल त्यांना 'नाइटहूड' पदवीने सन्मानित करण्यात आले. विस्डेनच्या 'क्रिकेटर्स ऑफ द सेंच्युरी'मध्ये त्यांचा समावेश करण्यात आला आणि आयसीसी हॉल ऑफ फेममध्ये त्यांना स्थान देण्यात आले. हे सन्मान क्रिकेटवर त्यांनी पाडलेल्या व्यापक आणि चिरस्थायी प्रभावाची साक्ष देतात.
अनेक क्रिकेट तज्ञ आणि चाहत्यांच्या मते, सर गार्फिल्ड सोबर्स यांच्यापेक्षा अधिक परिपूर्ण क्रिकेटपटू आजवर कोणीही झालेला नाही. त्यांच्या पदार्पणानंतर सहा दशकांहून अधिक काळ लोटला असला तरी, जगातील प्रत्येक महान अष्टपैलू क्रिकेटपटूचे मूल्यमापन करण्यासाठी सर गार्फिल्ड सोबर्स हे एक मापदंड म्हणून कायम आहेत.
२८ जुलै, १९३६ रोजी बार्बाडोस येथे जन्मलेल्या सर गार्फिल्ड सोबर्स यांनी १६० कसोटी डावांमध्ये ५७.७८ च्या सरासरीने ८०३२ धावा केल्या. या काळात त्यांनी ३० अर्धशतके आणि २६ शतकेही झळकावली. या प्रकारातील त्यांची सर्वोच्च धावसंख्या नाबाद ३६५ होती.
वेस्ट इंडिजचे हे महान अष्टपैलू क्रिकेटपटू गोलंदाजीतही मागे नव्हते. त्याने ९३ कसोटी सामन्यांमध्ये १५९ डावांत २३५ बळी घेतले. त्याची गोलंदाजीची सरासरी ३४.०३ आणि इकॉनॉमी रेट २.२२ होता. त्याने सहा वेळा ५ बळी आणि आठ वेळा ४ बळी घेतले. एका सामन्यातील त्याची सर्वोत्तम गोलंदाजी कामगिरी ८/८० आहे.
सोबर्स यांनी ५ सप्टेंबर १९७३ रोजी एकदिवसीय क्रिकेटमध्ये पदार्पण केले. त्याच्या कारकिर्दीतील या एकमेव एकदिवसीय सामन्यात त्यांनी एकही धाव केली नाही. पण, त्यांनी एक बळी घेतला. वेस्ट इंडिजच्या या अष्टपैलू क्रिकेटपटूने देशांतर्गत क्रिकेटमध्येही उत्कृष्ट कामगिरी केली. त्यांनी ३८३ प्रथम-श्रेणी सामन्यांमध्ये २८,३१४ धावा केल्या आणि १,०४३ बळी घेतले. तसेच, त्याच्या नावावर ९५ लिस्ट ए सामन्यांमध्ये २,७२१ धावा आणि १०९ बळी आहेत.
आयसीसी-बीसीसीआयने सर गॅरी सोबर्स यांना श्रद्धांजली वाहिली
आंतरराष्ट्रीय क्रिकेट परिषदेने (आयसीसी) आपल्या शोकसंदेशात लिहिले आहे, क्रिकेट जगताला शोभा देणाऱ्या महान क्रिकेटपटूंपैकी एक, सर गार्फिल्ड सोबर्स यांचे दुःखद निधन झाले आहे. आमच्या संवेदना त्यांच्या कुटुंबीयांसोबत, मित्रांसोबत आणि वेस्ट इंडिज क्रिकेटसोबत आहेत. आम्ही आयसीसी हॉल ऑफ फेममध्ये स्थान मिळवलेल्या एका क्रिकेटपटूला निरोप देत आहोत.
भारतीय क्रिकेट नियामक मंडळाने (बीसीसीआय) देखील सर गार्फिल्ड सोबर्स यांना श्रद्धांजली वाहिली. बीसीसीआय सर गार्फिल्ड सोबर्स यांच्या निधनाबद्दल शोक व्यक्त करते. ते या खेळाचे खरे प्रतीक आणि क्रिकेटच्या महान अष्टपैलू क्रिकेटपटूंपैकी एक होते. त्यांची असामान्य कामगिरी, कॅरिबियन क्रिकेटवरील त्यांचा चिरस्थायी प्रभाव आणि जगभरातील खेळासाठी दिलेले त्यांचे योगदान यांनी एक असा चिरस्थायी वारसा मागे ठेवला आहे, जो येणाऱ्या पिढ्यांना प्रेरणा देत राहील. त्यांच्या कुटुंबीयांना, मित्रांना आणि जगभरातील क्रिकेट समुदायाला आमच्या मनःपूर्वक संवेदना. त्यांच्या आत्म्यास शांती लाभो, असे बीसीसीआयने लिहिले.
---------------
हिंदुस्थान समाचार / वृषाली देशपांडे
