झुरिच, २३ जुलै (हिं.स.)२०२६ फिफा विश्वचषकासाठी चाहत्यांनी निवडलेला ड्रीम इलेव्हन संघ जाहीर करण्यात आला आहे. या संघात अर्जेंटिनाचा लिओनेल मेस्सी, फ्रान्सचा किलियन एम्बाप्पे, नॉर्वेचा अर्लिंग हालंड आणि इंग्लंडचा ज्यूड बेलिंगहॅम यांसारख्या दिग्गज फुटबॉलपटूंचा समावेश आहे. विश्वचषकातील आपल्या प्रभावी कामगिरीने सर्वांना प्रभावित करणाऱ्या केप व्हर्डेचा गोलकीपर वोजिन्हा याचाही ड्रीम इलेव्हनमध्ये समावेश करण्यात आला आहे.

४० वर्षीय वोजिन्हा याला वर्षातील सर्वोत्तम गोलकीपरसाठीच्या चाहत्यांच्या मतदानात ३९.६ टक्के मते मिळाली. विश्वचषकात पदार्पण करणाऱ्या केप वर्दे संघासाठी त्याने उत्कृष्ट कामगिरी केली. पण स्पर्धेचा गोल्डन ग्लोव्ह पुरस्कार स्पेनच्या युनाई सिमॉनला मिळाला, ज्याची निवड फिफाच्या तांत्रिक गटाने केली होती.

विश्वचषकापूर्वी पोर्तुगालच्या दुसऱ्या डिव्हिजनमधील क्लब चावेस सोडल्यापासून वोझिन्हाने कोणत्याही क्लबसोबत करार केला नव्हता. असे असूनही, त्याने विश्वचषकात उत्कृष्ट कामगिरी केली आणि स्पेनविरुद्धच्या गोलशून्य बरोबरीच्या सामन्यात सात अप्रतिम बचाव केले. ३२ संघांच्या फेरीत अर्जेंटिनाला अतिरिक्त वेळेत खेळायला लावण्यातही त्याने महत्त्वाची भूमिका बजावली.

नॉर्वेचा स्टार स्ट्रायकर अर्लिंग हालंडला फॉरवर्ड्सच्या मतदानात २७.५ टक्के मते मिळाली. हालंडने पाच सामन्यांमध्ये सात गोल केले आणि आपल्या संघाला पहिल्यांदाच विश्वचषकाच्या उपांत्यपूर्व फेरीत पोहोचवण्यात महत्त्वाची भूमिका बजावली. त्याने उपांत्यपूर्व फेरीपूर्वीच्या सामन्यात पाच वेळच्या चॅम्पियन ब्राझीलविरुद्ध २-१ च्या विजयात दोन गोलही केले. त्यानंतर इंग्लंडविरुद्ध नॉर्वेला पराभव सहन करावा लागला होता. आणि त्यांचे आव्हान संपुष्टात आले होते.

हालंड आणि वोलिन्हा यांच्या व्यतिरिक्त, लिओनेल मेस्सी, किलियन एमबाप्पे, ज्यूड बेलिंगहॅम, रोड्री, मायकल ओलिसेह, पेड्रो पोरो, लिसांद्रो मार्टिनेझ, डायो उपामेकानो आणि मार्क कुकुरेला यांचाही ड्रीम इलेव्हनमध्ये समावेश आहे.

फिफा विश्वचषक 2026 ड्रीम इलेव्हन

गोलकीपर: वोजिन्हा (केप वर्दे)

डिफेंडर: पेड्रो पोरो (स्पेन), लिसांड्रो मार्टिनेझ (अर्जेंटिना), दायो उपमेकानो (फ्रान्स), मार्क कुकुरेला (स्पेन)

मिडफिल्डर: रॉड्रि (स्पेन), मायकेल ऑलिसेह (फ्रान्स), ज्युड बेलिंगहॅम (इंग्लंड)

फॉरवर्ड्स: लिओनेल मेस्सी (अर्जेंटिना), एर्लिंग हॅलँड (नॉर्वे), किलियन एमबाप्पे (फ्रान्स)

---------------

हिंदुस्थान समाचार / वृषाली देशपांडे