मस्कत (ओमान), 24 जुलै (हिं.स.)। एफआयएच यूथ हॉकी5एस आशियाई चॅम्पियनशिप 2026 मध्ये भारतीय उप-कनिष्ठ महिला आणि पुरुष संघांची दमदार कामगिरी सातत्याने सुरू आहे. गुरुवारी खेळल्या गेलेल्या एलिट पूलमधील सामन्यांमध्ये भारतीय महिला संघाने कझाकिस्तानचा 10-0 असा धुव्वा उडवला, तर पुरुष संघाने बांगलादेशचा 8-3 असा पराभव करून सलग विजयाची मालिका कायम राखली.

महिला गटात भारताने सुरुवातीपासूनच आक्रमक खेळाचे प्रदर्शन केले. नौशीन नाझ हिने सामन्याच्या पहिल्याच मिनिटाला सलग दोन गोल झळकावत भारताला 2-0 अशी आघाडी मिळवून दिली. पहिल्या हाफपर्यंत भारतीय संघ हीच आघाडी कायम ठेवत होता, मात्र दुसऱ्या हाफमध्ये त्यांनी खेळाचा वेग आणखी वाढवत आणखी आठ गोल करत कझाकिस्तानला पूर्णपणे सामन्याबाहेर फेकले.

'प्लेयर ऑफ द मॅच' संदीपा कुमारी हिने 11व्या, 16व्या आणि 18व्या मिनिटाला गोल करत हॅट्ट्रिक पूर्ण केली. नौशीन नाझ हिनेही शानदार कामगिरी करत पहिल्या, पहिल्या, 15व्या आणि 20व्या मिनिटाला चार गोल झळकावले. याशिवाय किरण एक्का (15वे मिनिट), नीलम टोपनो (17वे मिनिट) आणि पुष्पा मांझी (19वे मिनिट) यांनीही गोल करत भारताचा एकतर्फी विजय निश्चित केला.

पुरुष गटात भारत आणि बांगलादेश यांच्यात पहिल्या हाफमध्ये चुरशीची लढत पाहायला मिळाली. भारतीय कर्णधार आणि 'प्लेयर ऑफ द मॅच' केतन कुशवाहा याने चौथ्या आणि आठव्या मिनिटाला दोन गोल केले, तर शाहरुख अली याने तिसऱ्या मिनिटाला एक गोल करत भारताला 3-2 अशी आघाडी मिळवून दिली. बांगलादेशकडून मोहम्मद होसेन (6वे मिनिट) आणि सोहराब सोटोन (8वे मिनिट) यांनी गोल करत सामना रंगतदार ठेवला.

दुसऱ्या हाफमध्ये भारतीय संघ पूर्णपणे वर्चस्व गाजवत होता. केतन कुशवाहा याने 12व्या आणि 15व्या मिनिटाला आणखी दोन गोल करत आपल्या चार गोलांची नोंद पूर्ण केली. तर रोमित पाल (13वे मिनिट), प्रहलाद राजभर (14वे मिनिट) आणि राहुल यादव (18वे मिनिट) यांनीही प्रत्येकी एक गोल केला. बांगलादेशकडून सोहराब सोटोन याने 11व्या मिनिटाला आपला दुसरा गोल केला, मात्र तो संघाचा पराभव टाळू शकला नाही.

आता भारतीय महिला संघ आपल्या पुढील सामन्यांमध्ये चीन आणि उझबेकिस्तानचा सामना करणार आहे, तर पुरुष संघ 24 जुलै रोजी ओमान आणि पाकिस्तानविरुद्ध मैदानात उतरणार आहे. विशेष म्हणजे, ही स्पर्धा पहिल्या एफआयएच यूथ हॉकी5एस विश्वचषकासाठी आशियाई पात्रता स्पर्धाही आहे.

---------------

हिंदुस्थान समाचार / Suraj Chaugule