नवी दिल्ली, 24 जुलै (हिं.स.)। देशांतर्गत शेअर बाजारात शुक्रवारी मोठी चढ-उताराची स्थिती पाहायला मिळाली. व्यवहाराच्या सुरुवातीला बाजारावर जोरदार विक्रीचा दबाव होता. त्यानंतर खरेदी वाढल्याने बाजाराने नीचांकी पातळीवरून उल्लेखनीय सावरत पुनरागमन केले. मात्र दिवसअखेरीस पुन्हा विक्रीचा दबाव वाढल्याने सेन्सेक्स आणि निफ्टी हे दोन्ही प्रमुख निर्देशांक ०.४३ टक्क्यांच्या घसरणीसह बंद झाले. या घसरणीमुळे गुंतवणूकदारांच्या संपत्तीत सुमारे ९२ हजार कोटी रुपयांची घट झाली.
बीएसईचा सेन्सेक्स ६३८.२० अंकांच्या घसरणीसह ७५,७०८.१९ अंकांवर उघडला. सुरुवातीच्या काही मिनिटांत खरेदी वाढल्यामुळे निर्देशांकाने काही प्रमाणात सुधारणा करत ७५,९९५.७३ अंकांपर्यंत मजल मारली. मात्र त्यानंतर विक्रीचा जोर वाढत गेला आणि सकाळी अकराच्या सुमारास सेन्सेक्स ९१६.९६ अंकांनी घसरून ७५,४७४.४३ अंकांच्या तळाच्या पातळीवर पोहोचला. त्यानंतर बाजारात पुन्हा खरेदी सुरू झाल्याने सेन्सेक्सने जोरदार उसळी घेत दुपारी दोनच्या सुमारास ७६,२१०.९५ अंकांपर्यंत पुनरागमन केले. मात्र अखेरीस पुन्हा विक्री वाढल्याने सेन्सेक्स ३३१.६२ अंकांच्या घसरणीसह ७६,०५९.७७ अंकांवर बंद झाला.
एनएसईचा निफ्टी २०३.२५ अंकांनी घसरून २३,६६६.३५ अंकांवर व्यवहाराला सुरुवात झाली. सुरुवातीच्या खरेदीनंतर तो २३,७६३.५५ अंकांपर्यंत गेला, परंतु त्यानंतरच्या विक्रीमुळे तो २३,६०६.३० अंकांपर्यंत खाली आला. दुपारनंतर खरेदीचा जोर वाढल्याने निफ्टीनेही चांगली सुधारणा करत २३,८२३.६० अंकांचा स्तर गाठला. मात्र दिवसाच्या शेवटी तो १०२.१५ अंकांच्या घसरणीसह २३,७६७.४५ अंकांवर बंद झाला.
क्षेत्रनिहाय पाहता, ऑटोमोबाईल क्षेत्रातील समभागांवर सर्वाधिक दबाव राहिला आणि निफ्टी ऑटो निर्देशांक १.१० टक्क्यांनी घसरला. याशिवाय मेटल, एनर्जी, रिअल्टी, ऑइल अँड गॅस, फार्मास्युटिकल, इन्फ्रास्ट्रक्चर, कॅपिटल गुड्स, कन्झ्युमर ड्युरेबल आणि पब्लिक सेक्टर एंटरप्राइज निर्देशांकही घसरणीसह बंद झाले. दुसरीकडे, मीडिया क्षेत्रात जोरदार खरेदी झाल्याने निफ्टी मीडिया निर्देशांक १.९७ टक्क्यांनी वधारला. आयटी, पीएसयू बँक आणि एफएमसीजी निर्देशांकही वाढीसह बंद झाले.
ब्रॉडर मार्केटमध्येही दबाव कायम राहिला. निफ्टी मिडकॅप निर्देशांक ०.१० टक्क्यांनी, तर स्मॉलकॅप निर्देशांक ०.३२ टक्क्यांनी घसरला. बीएसईमध्ये सूचीबद्ध कंपन्यांचे एकूण मार्केट कॅपिटलायझेशन ४७६.६१ लाख कोटी रुपयांवरून ४७५.६९ लाख कोटी रुपयांवर आले. त्यामुळे एका दिवसात गुंतवणूकदारांच्या संपत्तीत सुमारे ९२ हजार कोटी रुपयांची घट नोंदवली गेली. दिवसअखेरीस एचसीएल टेक्नॉलॉजी, विप्रो, सिप्ला, आयटीसी आणि एचडीएफसी लाइफ हे प्रमुख वाढणारे समभाग ठरले, तर बजाज फिनसर्व्ह, एटरनल, महिंद्रा अँड महिंद्रा, श्रीराम फायनान्स आणि टाटा कन्झ्युमर प्रॉडक्ट्स हे सर्वाधिक घसरणारे समभाग ठरले.
---------------
हिंदुस्थान समाचार / Suraj Chaugule
