जम्मू, २५ जुलै (हि.स.)खराब हवामानामुळे सहा दिवसांपासून थांबलेली वार्षिक अमरनाथ यात्रा शनिवारी जम्मू येथून पुन्हा सुरू झाली. अधिकाऱ्यांनी सांगितले की, ६,००० हून अधिक यात्रेकरूंची एक नवीन तुकडी भगवती नगर बेस कॅम्पवरून काश्मीर खोऱ्यातील बाल्टाल बेस कॅम्पकडे रवाना झाली.
जम्मू आणि काश्मीरमधील सततच्या पावसामुळे आणि खराब हवामानामुळे खबरदारीचा उपाय म्हणून १९ जुलै रोजी ही यात्रा स्थगित करण्यात आली होती. ३,८८० मीटर उंचीवरील पवित्र गुहा मंदिराकडे जाणाऱ्या दोन मार्गांवर विशेषतः हे निर्बंध लादण्यात आले होते – अनंतनाग जिल्ह्यातील ४८ किलोमीटर लांबीचा पारंपरिक पहलगाम मार्ग आणि गांदरबल जिल्ह्यातील १४ किलोमीटर लांबीचा छोटा बाल्टाल मार्ग.
अधिकाऱ्यांनी सांगितले की, या १८ व्या तुकडीमध्ये ६,२६९ यात्रेकरू असून, त्यात १,४७० महिला, २५ मुले आणि ५४ साधूंचा समावेश आहे. कडक सुरक्षा व्यवस्थेत २२३ वाहनांच्या ताफ्यासह हा गट पहाटे २:४० च्या सुमारास बाल्टाल बेस कॅम्पकडे रवाना झाला. पहलगाम मार्गासाठी कोणताही ताफा पाठवण्यात आला नव्हता, असे त्यांनी सांगितले.
उधमपूर-रामबन विभागातील अनेक ठिकाणी भूस्खलन आणि दगड कोसळल्याने तीन दिवस बंद असलेला जम्मू-श्रीनगर राष्ट्रीय महामार्ग हवामान सुधारल्यानंतर आणि वाहतूक पुन्हा सुरू झाल्यानंतर यात्रा पुन्हा सुरू झाली, असे अधिकाऱ्यांनी सांगितले.खोऱ्यातील वार्षिक यात्रेच्या एक दिवस आधी, २ जुलै रोजी, नायब राज्यपाल मनोज सिन्हा यांनी भगवती नगर बेस कॅम्पवरून यात्रेकरूंच्या पहिल्या तुकडीला हिरवा झेंडा दाखवला. रक्षाबंधनच्या सणासोबतच २८ ऑगस्ट रोजी यात्रा समाप्त होईल. आतापर्यंत सुमारे चार लाख यात्रेकरूंनी या गुहा मंदिराला भेट दिली असून, त्यापैकी सुमारे १.२० लाख यात्रेकरूंनी जम्मूतील भगवती नगर बेस कॅम्पवरून आपल्या यात्रेला सुरुवात केली आहे.
अधिकाऱ्याने यात्रेकरूंना प्रशासन आणि सुरक्षा यंत्रणांच्या सूचनांचे पालन करून ठरलेल्या व्यवस्थेनुसार प्रवास करण्याचा सल्ला दिला आहे.
विशेष म्हणजे, कडक सुरक्षा व्यवस्था करण्यात आली असून, केंद्रीय राखीव पोलीस दल, जम्मू आणि काश्मीर पोलीस आणि इतर सुरक्षा यंत्रणांचे हजारो जवान मार्गांवर तैनात करण्यात आले आहेत.
---------------
हिंदुस्थान समाचार / वृषाली देशपांडे
