नवी दिल्ली, २७ जुलै (हिं.स.) 'कॉकरोच जनता पार्टी'च्या (सीजेपी) सोशल मीडिया मोहिमेअंतर्गत झालेल्या विद्यार्थी आंदोलनात सक्रिय असलेले पर्यावरणवादी सोनम वांगचुक यांना सोमवारी गुरुग्राम येथील मेदांता रुग्णालयातून डिस्चार्ज देण्यात आला. वांगचुक यांनी स्वतः इन्स्टाग्रामवरील एका व्हिडिओद्वारे ही माहिती दिली. सोनम वांगचुक म्हणाले की, जनतेने आवाज उठवला आणि या महत्त्वाच्या चळवळीला पाठिंबा दिला. आपण यशस्वी झालो आहोत आणि हे सर्वांच्या प्रयत्नांचे फळ आहे, असा विश्वास त्यांनी व्यक्त केला.

आपल्या व्हिडिओ संदेशात, सोनम वांगचुक यांनी आपल्या प्रकृतीत झालेल्या सुधारणेबद्दल आनंद व्यक्त केला. त्यांनी सांगितले की, त्यांच्यावर रुग्णालयात उपचार सुरू असून त्यांची प्रकृती आता पूर्वीपेक्षा खूपच चांगली आहे. त्यांची ऊर्जा हळूहळू परत येत आहे. त्यांनी आपल्या प्रकृतीत सुधारणा झाल्याबद्दल डॉक्टर आणि रुग्णालयातील कर्मचाऱ्यांचे आभारही मानले.

सोनम वांगचुक यांनी, पत्नी गीतांजली आंगमो यांच्यासह, गुरुग्राम येथील मेदांता रुग्णालयातून डिस्चार्ज मिळाल्यानंतर राजघाटावर महात्मा गांधींना आदरांजली वाहिली. वांगचुक यांनी २६ दिवसांचे उपोषण आणि आंदोलन संपवून ही आदरांजली अर्पण केली.

राजघाटावर आदरांजली वाहिल्यानंतर त्यांनी आपले विचार मांडले. वांगचुक म्हणाले की, त्यांना सर्वप्रथम महात्मा गांधींचे स्मरण करायचे होते. त्यांनी गांधीजींप्रति कृतज्ञता व्यक्त केली. त्यांनी देशाला सांगितले की, गांधीजींनी दाखवलेला मार्ग शंभर वर्षांपूर्वी जितका खरा आणि समर्पक होता, तितकाच तो आजही आहे. गेल्या पाच-सहा वर्षांपासून ते लडाखमध्ये गांधीजींच्या पद्धतीचा सराव करत आहेत. त्यांना ती पद्धत अत्यंत अचूक आणि समर्पक वाटली. सुरुवातीला, ही पद्धत राष्ट्रीय स्तरावर यशस्वी होईल की नाही याबद्दल त्यांना खात्री नव्हती.

पेपरफुटी थांबवण्याची आणि परीक्षा पद्धतीत पारदर्शकतेची मागणी करणाऱ्या चालू आंदोलनादरम्यान प्रकृती खालावल्यानंतर त्यांना सुरुवातीला वैद्यकीय देखरेखेखाली ठेवण्यात आले होते. नंतर, उच्च न्यायालयाच्या आदेशानुसार त्यांना मेदांता रुग्णालयात दाखल करण्यात आले, जिथे तज्ज्ञ डॉक्टरांचे एक पथक त्यांच्यावर सतत देखरेख ठेवत होते.

---------------

हिंदुस्थान समाचार / वृषाली देशपांडे