मियामी, 03 जुलै, (हिं.स.)। लिओनेल मेस्सीच्या निवृत्तीबद्दल अंदाज बांधण्याऐवजी त्याच्या कारकिर्दीतील प्रत्येक सामना आणि प्रत्येक क्षणाचा आनंद घ्यावा, असे आवाहन अर्जेंटिनाचा मिडफील्डर रॉड्रिगो डी पॉल याने फुटबॉल चाहत्यांना केले आहे. २०२६ च्या विश्वचषकाच्या 'राउंड ऑफ ३२' मध्ये केप वर्दे विरुद्धच्या सामन्यापूर्वी बोलताना डी पॉलने नमूद केले की, मेस्सीसारखा खेळाडू आयुष्यात एकदाच पाहायला मिळतो.

३९ वर्षीय लिओनेल मेस्सी आपला सहावा विश्वचषक खेळत आहे आणि अशी व्यापक चर्चा आहे की अर्जेंटिनाच्या जर्सीमधील ही त्याची शेवटची स्पर्धा असू शकते. मात्र, डी पॉलने स्पष्ट केले की संघ अजूनही 'मेस्सी-नंतरच्या काळा'बद्दल विचार करत नाही.

सामन्यापूर्वीच्या पत्रकार परिषदेत डी पॉल म्हणाला, माझ्यासाठी सर्वात महत्त्वाची गोष्ट म्हणजे आम्ही लिओ मेस्सीचा दररोज आनंद घेतो, जसा प्रत्येक अर्जेंटिनी नागरिक घेतो. अनेकदा एखादी गोष्ट गेल्यावरच आपल्याला तिचे खरे मूल्य समजते, पण सध्या मेस्सी आपल्यासोबत आहे आणि आपण वर्तमानातील क्षणांचा आनंद घेतला पाहिजे.

मेस्सीने या विश्वचषकात आतापर्यंत तीन सामन्यांत सहा गोल केले आहेत. अल्जेरियाविरुद्धच्या सलामीच्या सामन्यात त्याने हॅट्ट्रिकही साधली होती आणि सध्या तो 'गोल्डन बूट'च्या शर्यतीत आघाडीवर आहे.

चाहत्यांमध्ये मेस्सीचा अंगरक्षक (बॉडीगार्ड) म्हणून ओळखल्या जाणाऱ्या डी पॉलने आपल्या कर्णधारासोबतच्या संबंधांचे वर्णन आपल्या आयुष्यातील सर्वात मोठ्या यशांपैकी एक असे केले.

तो म्हणाला, लिओनेल मेस्सीचा चांगला मित्र असणे माझ्यासाठी खूप मोलाचे आहे. मैत्री ही आयुष्यातील सर्वात महत्त्वाच्या गोष्टींपैकी एक आहे. त्याच्यासोबत वेळ घालवणे. मग ते मैदानावर असो किंवा मैदानाबाहेर. ही माझ्यासाठी अभिमानाची गोष्ट आहे. मी स्वतःला अत्यंत नशीबवान समजतो.

डी पॉल गेल्या वर्षी ॲटलेटिको माद्रिदहून इंटर मियामीमध्ये मेस्सीसोबत सामील झाला. डी पॉलने कबूल केले की त्यांना नॉकआउट फेरीत स्पेन किंवा उरुग्वेसारख्या बलाढ्य संघांचा सामना करावा लागेल अशी अपेक्षा होती, परंतु केप वर्देने आपल्या प्रभावी कामगिरीने सर्वांनाच आश्चर्यचकित केले.

तो म्हणाला, आम्ही अशा संघाविरुद्ध खेळत आहोत ज्याने गट फेरीत (group stage) उत्कृष्ट फुटबॉल खेळला आहे. आम्हाला हा सामना अत्यंत गांभीर्याने घ्यावा लागेल, कारण तो आमच्यासाठी अत्यंत महत्त्वाचा आहे.

जवळपास आठ वर्षांपासून अर्जेंटिनाचे मुख्य प्रशिक्षक लिओनेल स्कालोनी यांचा विश्वासू खेळाडू असलेल्या डी पॉलचा असा विश्वास आहे की नॉकआउट सामन्यांमधील अनुभवाचा संघाला फायदा होईल, जरी प्रत्येक सामना वेगळा असतो. ते म्हणाले, आम्हाला नॉकआउट सामन्यांचा अनुभव आहे, पण प्रत्येक सामना एक नवीन आव्हान घेऊन येतो. अशा सामन्यांमध्ये भावनांचा भडिमार असतो. त्या भावना कशा हाताळायच्या हे अनुभव शिकवतो, पण त्यांचा आदर करणेही तितकेच महत्त्वाचे असते.

विश्वविजेता अर्जेंटिनाचा संघ शुक्रवारी मियामीमध्ये मैदानात उतरेल आणि केप वर्देवर विजय मिळवून उपांत्यपूर्व फेरीत स्थान निश्चित करण्याचे उद्दिष्ट ठेवेल.

---------------

हिंदुस्थान समाचार / हर्षदा गावकर