नाशिक, 04 जुलै (हिं.स.)।

- कांदा उत्पादक शेतकऱ्यांसाठी एक महत्त्वपूर्ण दिलासा म्हणून, केंद्र सरकारने किंमत स्थिरीकरण निधीअंतर्गत महाराष्ट्रात कांद्याचा खरेदी दर प्रति क्विंटल १,८७५ रुपयांवरून २,१२५ रुपयांपर्यंत वाढवला आहे. सुधारित दर शनिवार (४ तारीख) पासून लागू झाले असून, त्यामुळे शेतकऱ्यांना प्रति क्विंटल २५० रुपयांचा अतिरिक्त लाभ मिळणार आहे.

ग्राहक व्यवहार, अन्न आणि सार्वजनिक वितरण मंत्रालयाच्या संचालक शिवानी गोयल यांनी या संदर्भात एक परिपत्रक जारी केले. राष्ट्रीय कांदा बफर स्टॉक तयार करण्यासाठी NAFED आणि NCCF मार्फत होणाऱ्या कांदा खरेदीवर हा सुधारित दर लागू होईल.

शेतकऱ्यांना आर्थिक दिलासा देण्यासोबतच, या नवीन दरामुळे बाजारातील कांद्याचे भाव स्थिर होण्यासही मदत होईल. सध्या खुल्या बाजारात कांद्याचे भाव दबावाखाली असल्याने, केंद्र सरकारचा हा निर्णय कांदा उत्पादक शेतकऱ्यांसाठी महत्त्वपूर्ण मानला जात आहे. या दरवाढीमुळे NAFED आणि NCCF खरेदी केंद्रांवर शेतकऱ्यांचा प्रतिसाद वाढेल, अशी आशा आहे.

दरम्यान, पूर्वी दरवाढ होऊनही, नाफेड (NAFED) आणि एनसीसीएफ (NCCF) च्या खरेदी केंद्रांना अपेक्षित प्रतिसाद मिळाला नाही. सरकारने ३० जूनपर्यंत खरेदीचे लक्ष्य पूर्ण करण्याचे निर्देश दिले असले तरी, ४०% लक्ष्यही साध्य झाले नाही. तथापि, अशी अपेक्षा आहे की नवीन दरवाढीमुळे खरेदीला गती मिळेल आणि अधिक शेतकरी या योजनेचा लाभ घेतील.

चौकट

दरात अशाप्रकारे वाढ

यापूर्वी, नाफेड आणि एनसीसीएफने कांदा खरेदीचे दर टप्प्याटप्प्याने वाढवले होते. सुरुवातीला, खरेदी १,२३५ रुपये प्रति क्विंटल दराने सुरू झाली. त्यानंतर, २६ मे रोजी दर १,५८० रुपये, १२ जून रोजी १,६५० रुपये, १९ जून रोजी १,७३० रुपये आणि ४ जुलै रोजी १,८७५ रुपये करण्यात आले. आता, केंद्र सरकारच्या नवीन आदेशानुसार, खरेदीचा दर थेट २,१२५ रुपये प्रति क्विंटल करण्यात आला आहे.

---------------

हिंदुस्थान समाचार / GOSAVI CHANDRASHEKHAR SUKDEV