मुंबई, 04 जुलाई (हि.स.) - मध्य रेल्वेने दिनांक २९.०६.२०२६ ते दिनांक ०३.०७.२०२६ या कालावधीत आपल्या सर्व विभागांमध्ये 'पल्स पोलिओ लसीकरण मोहीम' यशस्वीपणे राबवली. ही मोहीम राज्य सरकार आणि स्थानिक महानगरपालिका प्रशासनाच्या समन्वयाने दिनांक २८.०६.२०२६ ते दिनांक ०३.०७.२०२६ या कालावधीत राबवल्या जाणाऱ्या 'राष्ट्रीय पल्स पोलिओ लसीकरण कार्यक्रमा'चा एक भाग आहे. ० ते ५ वयोगटातील मुलांचे संपूर्ण लसीकरण सुनिश्चित करणे आणि 'पोलिओ-मुक्त भारत' घडवण्याच्या देशाच्या संकल्पाला बळकट करणे हा या उपक्रमाचा उद्देश आहे.

रेल्वे स्थानकांवर लसीकरणासाठी निश्चित केंद्रे आणि लसीकरण कक्ष पूर्ण तयारीसह उभारण्यात आले होते. प्रत्येक लसीकरण कक्षामध्ये तोंडावाटे दिली जाणारी पोलिओ लस, कोल्ड-चेन उपकरणे, लस वाहक, आवश्यक साधनसामग्री आणि इतर साहित्याचा पुरेसा साठा उपलब्ध करून देण्यात आला होता.

हा कार्यक्रम सुरळीतपणे राबवण्यासाठी वैद्यकीय अधिकारी, नर्सिंग अधिकारी, पॅरामेडिकल पथके आणि सहाय्यक कर्मचाऱ्यांनी परस्पर समन्वयाने काम केले. निश्चित लसीकरण कक्ष, बाह्य संपर्क केंद्रे आणि प्रवाशांची वर्दळ असलेल्या महत्त्वाच्या ठिकाणी ० ते ५ वयोगटातील मुलांना पोलिओची लस देण्यात आली. लसीकरणापासून वंचित राहिलेल्या मुलांपर्यंत पोहोचण्यासाठी घरोघरी जाऊन लसीकरण करण्याची मोहीमही राबवण्यात आली.

मध्य रेल्वेच्या कार्यक्षेत्रात एकूण ९०१७ मुलांना पोलिओची लस देण्यात आली. यामध्ये मुंबई विभागात १६४९, पुणे विभागात २५५४, भुसावळ विभागात १०२०, नागपूर विभागात २८७७ आणि सोलापूर विभागात ९१७ मुलांचा समावेश होता.

या मोहिमेदरम्यान मार्गदर्शक तत्त्वांचे पालन, कोल्ड-चेनची देखभाल आणि कागदपत्रांची पूर्तता यांवर लक्ष ठेवण्यासाठी वरिष्ठ आरोग्य अधिकारी आणि पर्यवेक्षक पथकांनी प्रत्यक्ष पाहणी केली. ही संपूर्ण मोहीम कोणत्याही विपरीत घटनेशिवाय किंवा व्यवस्थापकीय व्यत्ययाशिवाय यशस्वीपणे पार पडली.

सार्वजनिक आरोग्य आणि पोलिओ निर्मूलनाच्या राष्ट्रीय मोहिमेप्रती भारतीय रेल्वेची कटिबद्धता अधोरेखित करत, पात्र मुलांपर्यंत जास्तीत जास्त लसीकरण पोहोचवण्यासाठी 'पल्स पोलिओ लसीकरण कार्यक्रमा'ची पथके अथक परिश्रम घेत आहेत.

---------------

हिंदुस्थान समाचार / सुधांशू जोशी