अमरावती, 04 जुलै, (हिं.स.)। जिल्ह्यात सुरू असलेल्या मुसळधार पावसाचा मोठा फटका धारणी–परतवाडा मुख्य मार्गावरील वाहतुकीला बसला आहे. धारणी तालुक्यातील घटांग परिसरात शनिवारी पहाटे सुमारे २ वाजण्याच्या सुमारास एक मोठे झाड थेट रस्त्यावर कोसळल्याने धारणी–परतवाडा मार्ग पूर्णपणे बंद झाला. अचानक घडलेल्या या घटनेमुळे दोन्ही बाजूंना वाहनांच्या लांबच लांब रांगा लागल्या असून प्रवाशांना अनेक तास अडकून राहावे लागले.

गेल्या काही दिवसांपासून मेळघाट परिसरात जोरदार पाऊस सुरू आहे. सततच्या पावसामुळे जमिनीची पकड सैल झाल्याने हे मोठे झाड उन्मळून रस्त्यावर कोसळल्याचे प्राथमिक अंदाज व्यक्त करण्यात येत आहेत. झाड रस्त्याच्या मध्यभागी पडल्याने मोठी वाहने, एसटी बस, मालवाहू ट्रक तसेच खासगी वाहनांची वाहतूक पूर्णपणे ठप्प झाली. काही वाहनचालकांनी पर्यायी मार्ग शोधण्याचा प्रयत्न केला, मात्र परिसरातील भौगोलिक परिस्थितीमुळे त्यांनाही अडचणींचा सामना करावा लागला.

घटनेची माहिती मिळताच संबंधित प्रशासन, सार्वजनिक बांधकाम विभाग आणि वन विभागाचे कर्मचारी घटनास्थळी दाखल झाले. झाड हटविण्यासाठी यंत्रसामग्रीच्या सहाय्याने युद्धपातळीवर काम सुरू करण्यात आले आहे. पावसाचा जोर कायम असल्याने आणि झाडाचा आकार मोठा असल्यामुळे ते हटविण्यास काहीसा विलंब होत असल्याची माहिती प्रशासनाने दिली.

या घटनेमुळे धारणी, चिखलदरा आणि मेळघाट परिसराकडे जाणाऱ्या तसेच परतवाड्याकडे येणाऱ्या वाहनांची मोठी कोंडी झाली. अनेक प्रवाशांना प्रवासात विलंब सहन करावा लागला. सुदैवाने या घटनेत कोणतीही जीवितहानी किंवा वाहनांचे मोठे नुकसान झाल्याची माहिती समोर आलेली नाही.दरम्यान, हवामान विभागाने विदर्भात पुढील काही दिवस मुसळधार पावसाचा इशारा दिला असल्याने डोंगराळ आणि घाटमाथ्यावरील भागात प्रवास करताना विशेष खबरदारी घेण्याचे आवाहन करण्यात आले आहे. प्रशासनाने नागरिकांनी अनावश्यक प्रवास टाळावा, तसेच आवश्यक असल्यासच प्रवास करावा आणि पर्यायी मार्गांचा वापर करावा, असे आवाहन केले आहे. झाड हटविण्याचे काम सध्या युद्ध पातळीवर सुरु आहे.

---------------

हिंदुस्थान समाचार / अरुण जोशी