छत्रपती संभाजीनगर, 05 जुलै (हिं.स.)। सहकार क्षेत्रातील अत्यंत महत्त्वाची आणि प्रतिष्ठेची मानली गेलेली 'छत्रपती संभाजीनगर जिल्हा मध्यवर्ती सहकारी बँक' निवडणुकीत महायुतीने विरोधकांना धूळ चारत ऐतिहासिक विजयाचा झेंडा फडकवला आहे. या निवडणुकीत महायुतीने आखलेली तगडी रणनीती पूर्णपणे यशस्वी ठरल्याचे पाहायला मिळत आहे. बँकेच्या एकूण जागांपैकी बहुतांश जागांवर महायुतीचे वर्चस्व प्रस्थापित झाले असून महाविकास आघाडीला या निवडणुकीत मोठा धक्का बसला आहे.

या निवडणुकीत महायुतीने यापूर्वीच शिवसेना (शिंदे गट) आणि भाजपच्या 8 उमेदवारांना बिनविरोध निवडून आणले होते. त्यानंतर उर्वरित 12 जागांसाठी मतदान पार पडले. या 12 पैकी तब्बल 11 जागांवर महायुतीच्या उमेदवारांनी दणदणीत विजय मिळवला आहे. तर दुसरीकडे महाविकास आघाडीने रिंगणात उतरवलेल्या उमेदवारांपैकी केवळ काँग्रेसचे खासदार कल्याण काळे यांच्या व्यतिरिक्त एकाही उमेदवाराला विजय मिळवता आलेला नाही. मविआच्या सर्वच्या सर्व उमेदवारांना पराभवाचा सामना करावा लागला आहे.

अंबादास दानवे आणि अतुल सावेंसह दिग्गजांची बाजी या निवडणुकीत सर्वात जास्त लक्षवेधी ठरली ती म्हणजे मतदानाद्वारे झालेली 12 जागांची लढत. यामध्ये महायुतीच्या पॅनलमधून निवडणूक लढवणारे शिवसेना ठाकरे गटाचे आमदार आणि विधानपरिषदेचे माजी विरोधी पक्षनेते अंबादास दानवे यांनी विजय मिळवला आहे. त्यांच्यासह मंत्री अतुल सावे आणि भाजप आमदार अनुराधा चव्हाण, शिवसेना आमदार संजना जाधव या बड्या नेत्यांनीही बाजी मारली आहे.

मतदानातून विजयी झालेले महायुतीचे 11 उमेदवार

1 अंबादास दानवे - ठाकरे गट आमदार

2 अतुल सावे - मंत्री, भाजप नेते

3 अनुराधा चव्हाण - भाजप आमदार

4 संजना जाधव - शिवसेना आमदार

5 रवींद्र काळे

6 अर्जुन पाटील

7 रामराव शेळके

8 मुक्ता तांगडे

9 जाधव सुवर्णा

10 प्रभाकर काळे

11 शेषराव जाधव

8 उमेदवार आधीच झाले होते बिनविरोध

महायुतीने निवडणुकीची घोषणा झाल्यापासूनच मोर्चेबांधणी मजबूत केली होती. यामुळे पहिल्या टप्प्यातच महायुतीचे 8 उमेदवार बिनविरोध निवडून आले होते. यामध्ये प्रामुख्याने शिंदे गटाचे दोन बडे मंत्री आणि आमदारांचा समावेश होता.

1 संजय शिरसाट, मंत्री, शिवसेना शिंदे गट

2 विलास भुमरे - शिवसेना आमदार

3 रमेश बोरणारे - शिवसेना आमदार

4 अर्जुन गाडे

5 अनिल बोरसे

6 अब्दुल समीर

7 दिनेश परदेशी

8 संदीप निकम

महाविकास आघाडीची निराशा; केवळ एका जागेवर समाधान

या निवडणुकीत महाविकास आघाडीने महायुतीला तगडे आव्हान देण्याचा प्रयत्न केला होता. मात्र, मतदारांनी मविआच्या पॅनलला साफ नाकारल्याचे निकालावरून स्पष्ट होत आहे. मविआचे सर्व प्रमुख उमेदवार एकामागून एक पराभूत झाले. केवळ एकमेव अपवाद ठरले ते म्हणजे खासदार कल्याण काळे. खासदार कल्याण काळे यांनी आपली जागा राखत विजय मिळवला असून, ते मविआचे या निवडणुकीतील एकमेव विजयी उमेदवार ठरले आहेत. या ऐतिहासिक विजयानंतर छत्रपती संभाजीनगर जिल्हा बँकेवर आता पूर्णपणे महायुतीची सत्ता आली आहे.

---------------

हिंदुस्थान समाचार / Hanumant Madanrao Chitnis