रायगड, 08 जुलै (हिं.स.)। : माजी आमदार भाई जयंत पाटील यांच्या वाढदिवसानिमित्त बामणगाव येथील आदिवासी वाडीत समाजोपयोगी उपक्रमाचे आयोजन करण्यात आले. सौ. चित्रलेखा पाटील यांच्या पुढाकाराने तसेच सामाजिक कार्यकर्ते प्रतीक खारकर यांच्या सहकार्याने आदिवासी बांधवांना छत्र्यांचे वाटप करण्यात आले.

पावसाळ्याच्या पार्श्वभूमीवर गरजू नागरिकांना दैनंदिन जीवनात उपयोगी पडावे, या उद्देशाने हा उपक्रम राबविण्यात आला. दुर्गम भागातील आदिवासी कुटुंबांना पावसापासून संरक्षण मिळावे आणि त्यांच्या दैनंदिन हालचाली सुलभ व्हाव्यात, यासाठी छत्र्यांचे वितरण करण्यात आले.

यावेळी उपस्थितांनी माजी आमदार भाई जयंत पाटील यांना वाढदिवसाच्या शुभेच्छा देत त्यांच्या सामाजिक बांधिलकीच्या कार्याचे कौतुक केले. वाढदिवसानिमित्त केवळ औपचारिक कार्यक्रम न करता समाजोपयोगी उपक्रम राबविण्याच्या उपक्रमाचेही स्वागत करण्यात आले.

छत्री वाटपामुळे आदिवासी बांधवांनी आनंद व्यक्त करत आयोजकांचे मनःपूर्वक आभार मानले. समाजातील वंचित आणि गरजू घटकांपर्यंत मदतीचा हात पोहोचविणारे असे उपक्रम सातत्याने राबविण्यात यावेत, अशी अपेक्षाही यावेळी उपस्थितांनी व्यक्त केली. या उपक्रमात सौ. चित्रलेखा पाटील, विक्रांत वार्डे, सामाजिक कार्यकर्ते प्रतीक खारकर आणि अंकेत ठाकूर यांनी सक्रिय सहभाग घेतला. सर्वांच्या सहकार्यामुळे हा समाजोपयोगी उपक्रम यशस्वीपणे पार पडला.

---------------

हिंदुस्थान समाचार / संदेश साळुंके (रायगड)