अँटिग्वा, 08 जुलै (हिं.स.)वेस्ट इंडिजने चार वर्षांहून अधिक काळानंतर मायदेशात आपली पहिली कसोटी मालिका जिंकली आहे. अँटिग्वा येथील सर व्हिव्हियन रिचर्ड्स स्टेडियमवर श्रीलंकेविरुद्धचा दुसरा आणि अंतिम सामना पावसामुळे रद्द झाला आणि अनिर्णित राहिला. एका आठवड्यापूर्वी याच मैदानावर खेळल्या गेलेल्या पहिल्या कसोटीत डावाने दारुण पराभव पत्करल्यानंतर मालिका बरोबरीत आणण्यासाठी विजयाची गरज असलेल्या पाहुण्या संघाने आपला दुसरा डाव ९ गडी बाद २५१ धावांवर घोषित केला.

यामुळे यजमान संघासमोर दोन सामन्यांची मालिका जिंकण्यासाठी दोन सत्रांपेक्षा कमी वेळेत ३०२ धावांचे मोठे आव्हान उभे राहिले. वेस्ट इंडिजची सलामीची जोडी जॉन कॅम्पबेल आणि ब्रँडन किंग यांनी ८९ धावांची सलामीची भागीदारी केली. तथापि, पावसामुळे खेळात व्यत्यय आला, ज्यामुळे सरळ निकालाच्या आशा संपुष्टात आल्या. दुपारी ४० मिनिटांसाठी खेळ पुन्हा सुरू झाला, पण कॅरिबियन संघाने अंतिम डावात एकही गडी न गमावता १०९ धावा केल्यामुळे सामना अनिर्णित राहिला.

कॅम्पबेल आणि किंग प्रत्येकी ५१ धावांवर नाबाद राहिले. वेस्ट इंडिजने मायदेशात शेवटचा कसोटी मालिका विजय २०२२ मध्ये बांगलादेशविरुद्ध २-० ने मिळवला होता. श्रीलंकेविरुद्धचा त्यांचा शेवटचा मालिका विजय २००३ मध्ये मायदेशात झाला होता, जेव्हा त्यांनी अशीच दोन सामन्यांची मालिका १-० ने जिंकली होती.

सोबर्स-टिसेरा ट्रॉफी उचलण्यापूर्वी, कॅरिबियन कर्णधार रॉस्टन चेस म्हणाला की वेस्ट इंडिजचा क्रिकेटपटू म्हणून ही त्याची सर्वात मोठी कामगिरी आहे. वेस्ट इंडिजच्या जस्टिन ग्रीव्हजला सामनावीर आणि मालिकावीर म्हणून गौरविण्यात आले. त्याने दुसऱ्या सामन्यात १८० धावांची शानदार खेळी केली आणि एक बळी घेतला. संपूर्ण मालिकेत त्याने एकूण १८३ धावा केल्या आणि चार बळी घेतले.

---------------

हिंदुस्थान समाचार / वृषाली देशपांडे