रायगड, 09 जुलै (हिं.स.)। अमली पदार्थांच्या अवैध तस्करी विरोधातील मोहिमेला अधिक धार देत रायगड पोलिसांनी मोठी कारवाई केली आहे. एनडीपीएस कायद्यांतर्गत विविध कारवायांमध्ये जप्त करण्यात आलेले तब्बल ३७९.६९१ किलो अमली पदार्थ कायमस्वरूपी नष्ट करण्यात आले. या अमली पदार्थांची एकूण किंमत ३२६ कोटी १० लाख ६ हजार ३२४ रुपये इतकी असून, जिल्ह्यातील १२ पोलीस ठाण्यांमध्ये दाखल २७ गुन्ह्यांमधील हा मुद्देमाल होता.

रायगड जिल्ह्यात विविध ठिकाणी दाखल झालेल्या एनडीपीएस कायद्यांतर्गत गुन्ह्यांमध्ये गांजा, चरस, कोकेन आणि केटामाईन यांसारखे अमली पदार्थ जप्त करण्यात आले होते. संबंधित प्रकरणांतील न्यायालयीन प्रक्रिया पूर्ण झाल्यानंतर हा संपूर्ण मुद्देमाल मुंबई वेस्ट मॅनेजमेंट (Re-Sustainability Ltd.), तळोजा, नवी मुंबई येथे पर्यावरणपूरक व कायदेशीर पद्धतीने नष्ट करण्यात आला.

ही संपूर्ण प्रक्रिया रायगडच्या पोलीस अधीक्षक आँचल दलाल यांच्या मार्गदर्शनाखाली पार पडली. अपर पोलीस अधीक्षक अभिजीत शिवथरे, अतिरिक्त कार्यभार पोलीस उपअधीक्षक (गुन्हे) निवृत्ती बोऱ्हाडे आणि स्थानिक गुन्हे शाखेचे पोलीस निरीक्षक मिलिंद खोपडे यांनी या कारवाईचे नियोजन आणि अंमलबजावणी केली.

अमली पदार्थ नाश प्रक्रियेदरम्यान जिल्हास्तरीय अमली पदार्थ नाश समिती, शासकीय पंच, न्यायवैद्यक प्रयोगशाळा (कलिना) येथील तज्ज्ञ, महाराष्ट्र प्रदूषण नियंत्रण मंडळाचे अधिकारी तसेच वैधमापन शास्त्र विभागाचे अधिकारी उपस्थित होते. सर्व कायदेशीर आणि तांत्रिक निकषांची पूर्तता करून ही प्रक्रिया पार पाडण्यात आली.

रायगड पोलिसांनी अमली पदार्थांच्या तस्करीविरोधात सातत्याने कठोर भूमिका घेतली असून, केवळ तस्करांविरोधात कारवाई करण्यापुरते मर्यादित न राहता जप्त अमली पदार्थ कायमस्वरूपी नष्ट करून ते पुन्हा अवैध बाजारात पोहोचणार नाहीत, याचीही प्रभावी खबरदारी घेतली आहे. ३२६ कोटींपेक्षा अधिक किमतीचा अमली पदार्थांचा साठा नष्ट करण्याची ही कारवाई रायगड पोलिसांच्या अंमली पदार्थविरोधी मोहिमेतील एक महत्त्वाचा टप्पा मानली जात आहे.

---------------

हिंदुस्थान समाचार / संदेश साळुंके (रायगड)