न्यायासाठी जिल्हाधिकाऱ्यांकडे धाव
रायगड, 9 जुलै (हिं.स.) : वैमानिक होण्याचे स्वप्न उराशी बाळगलेल्या माणगाव तालुक्यातील मीनाक्षी टोळकर हिच्या शिक्षणासाठी आवश्यक असलेले शैक्षणिक कर्ज नाकारण्यात आल्याने तिच्या प्रशिक्षणास मोठा अडथळा निर्माण झाला आहे. या प्रकरणी मीनाक्षीचे वडील रमेश टोळकर यांनी रायगड जिल्हाधिकाऱ्यांकडे निवेदन सादर करून हस्तक्षेपाची मागणी केली आहे.
मीनाक्षी टोळकर सध्या बारामती येथील अकॅडमी ऑफ कार्व्हर एव्हिएशन प्रा. लि. येथे वैमानिक प्रशिक्षण घेत असून या प्रशिक्षणासाठी सुमारे ४७.५० लाख रुपये खर्च अपेक्षित आहे. या अनुषंगाने बँक ऑफ इंडिया, माणगाव शाखेकडे शैक्षणिक कर्जासाठी अर्ज करण्यात आला होता. कुटुंबाच्या म्हणण्यानुसार, गेल्या दीड वर्षात बँकेने मागितलेल्या विविध कागदपत्रांची पूर्तता करण्यात आली. तसेच स्वतःची आणि नातेवाईकांची मिळून सुमारे ८० ते ९० लाख रुपयांची मालमत्ता तारण ठेवण्याची तयारीही दर्शविण्यात आली होती.
मात्र, प्रशिक्षणाचा कालावधी आणि कर्जफेडीच्या क्षमतेबाबत शंका व्यक्त करत बँकेने अखेरीस कर्ज मंजूर करण्यास नकार दिल्याचे कुटुंबीयांचे म्हणणे आहे. प्रशिक्षण संस्थेने प्रत्यक्ष फ्लाईंग प्रशिक्षण पूर्ण होण्यासाठी दोन ते तीन वर्षे लागू शकतात, असे अधिकृतपणे स्पष्ट केले असतानाही त्याची पुरेशी दखल घेण्यात आली नसल्याचा आरोपही कुटुंबीयांनी केला आहे.
दीड वर्षांच्या प्रतीक्षेनंतर कर्ज नाकारण्यात आल्याने मीनाक्षीचे वैमानिक होण्याचे स्वप्न अधांतरी राहिल्याची भावना कुटुंबीयांनी व्यक्त केली आहे. या पार्श्वभूमीवर जिल्हा प्रशासनाने या प्रकरणात हस्तक्षेप करून बँकेच्या निर्णयाचा फेरविचार व्हावा, अशी मागणी करण्यात आली आहे.
मी कोणतीही सवलत मागत नाही. मला फक्त माझ्या शिक्षणाचा हक्क आणि न्याय हवा आहे, अशी भावनिक प्रतिक्रिया मीनाक्षी टोळकर हिने व्यक्त केली.
दरम्यान, या प्रकरणामुळे शैक्षणिक कर्ज मंजुरीची प्रक्रिया, व्यावसायिक शिक्षणासाठी आर्थिक सहाय्य आणि विद्यार्थ्यांना भेडसावणाऱ्या अडचणींचा मुद्दा पुन्हा चर्चेत आला असून, या प्रकरणाकडे विद्यार्थी, पालक आणि सामाजिक क्षेत्राचे लक्ष लागले आहे.
-----------------
हिंदुस्थान समाचार / संदेश साळुंके (रायगड)
