नवे सीईओ आणि पूर्णवेळ महासचिवांच्या नियुक्तीची शक्यता
अयोध्या, 10 ऑगस्ट (हिं.स.) : श्रीरामजन्मभूमी तीर्थ क्षेत्र ट्रस्टची प्रस्तावित बैठक 2 सप्टेंबर रोजी होणार आहे. या बैठकीत राम मंदिरासाठी नवीन मुख्य कार्यकारी अधिकारी (सीईओ) आणि पूर्णवेळ महासचिव यांची नियुक्ती करण्याबाबत निर्णय होण्याची शक्यता आहे. या नियुक्त्यांनंतर मंदिराच्या प्रशासकीय व्यवस्थेत तसेच कर्मचारी वर्गाशी संबंधित अनेक महत्त्वपूर्ण निर्णय घेतले जाण्याची शक्यता व्यक्त केली जात आहे.
सध्या अंतरिम महासचिव कृष्ण मोहन हे ट्रस्टच्या कर्मचाऱ्यांच्या अंतर्गत बदल्या करून तसेच देखरेख वाढवून मंदिरातील विविध व्यवस्थांचे संचालन करत आहेत. मात्र, अद्याप कोणत्याही कर्मचाऱ्याची नवीन नियुक्ती किंवा सेवेतून कपात करण्यात आलेली नाही. दरम्यान, पूर्वीच्या पदाधिकाऱ्यांचे निकटवर्तीय आणि नातेवाईक मानल्या जाणाऱ्या कर्मचाऱ्यांची अंतर्गत पातळीवर माहिती घेतली गेल्याचे सांगितले जात आहे.मंदिरातील देणगीच्या रकमेत चोरी झाल्याचे प्रकरण समोर आल्यानंतर तसेच दोन विश्वस्तांनी राजीनामा दिल्यानंतर ट्रस्टचे कर्मचारी आणि सेवेकरी यांच्यात मोठी खळबळ उडाली आहे. या प्रकरणाची एसआयटी आणि पोलिसांकडून चौकशी सुरू आहे. त्यामुळे अनेक कर्मचारी नियमितपणे काम करत असले तरी त्यांच्यामध्ये कारवाईबाबत चिंता निर्माण झाली आहे. यापैकी मोठ्या संख्येने कर्मचाऱ्यांच्या नियुक्त्या पूर्वीच्या पदाधिकाऱ्यांच्या शिफारशीवर झाल्याचे सांगितले जात आहे.
कर्मचारी कपात केल्यास व्यवस्थेवर परिणाम होण्याची शक्यता
सूत्रांच्या माहितीनुसार, बहुतांश नियुक्त्या पूर्वीच्या पदाधिकाऱ्यांच्या शिफारशीवर झाल्या आहेत. त्यामुळे एकाच वेळी मोठ्या प्रमाणावर कर्मचाऱ्यांना सेवेतून कमी केल्यास मंदिराच्या दैनंदिन व्यवस्थेवर परिणाम होऊ शकतो. याच कारणामुळे 2 सप्टेंबर रोजी होणाऱ्या ट्रस्टच्या बैठकीकडे सर्वांचे लक्ष लागले आहे. सीईओ आणि पूर्णवेळ महासचिवांची नियुक्ती झाल्यानंतर नव्या प्रशासकीय रचनेनुसार कर्मचारी वर्गाबाबत निर्णय घेतले जाण्याची शक्यता आहे. नवीन सीईओ आपल्या सहकार्यांसाठी स्वतंत्र टीम तयार करू शकतात. मंदिरात येणाऱ्या भाविकांना अधिक चांगल्या सुविधा उपलब्ध करून देणे आणि मंदिरातील व्यवस्थेचे सुरळीत संचालन करणे हा यामागील उद्देश असेल.
प्रवक्ता आणि सचिवांचीही नियुक्ती होण्याची शक्यता
ट्रस्टच्या एका पदाधिकाऱ्याने दिलेल्या माहितीनुसार, आगामी बैठकीत ट्रस्टच्या प्रवक्ता आणि सचिवांच्या नियुक्तीबाबतही निर्णय होण्याची शक्यता आहे. याशिवाय निवड समितीने सादर केलेल्या तीन नावांच्या पॅनेलवर चर्चा करून मुख्य कार्यकारी अधिकाऱ्याच्या नावावर अंतिम निर्णय घेतला जाऊ शकतो.पूर्णवेळ महासचिवपदाची जबाबदारी एखाद्या विश्वस्ताकडे सोपविण्याची शक्यताही व्यक्त केली जात आहे. त्याचबरोबर ट्रस्टमध्ये रिक्त असलेली तीन सदस्यपदे देखील 2 सप्टेंबरच्या बैठकीत भरण्यात येण्याची शक्यता आहे.त्यामुळे 2 सप्टेंबर रोजी होणारी ट्रस्टची बैठक राम मंदिराच्या प्रशासकीय व्यवस्था, कर्मचारी रचना आणि भविष्यातील कामकाजाच्या दृष्टीने अत्यंत महत्त्वाची मानली जात आहे.-------------------
हिंदुस्थान समाचार / मनीष कुलकर्णी
