कोलकाता, 21 ऑगस्ट (हिं.स.)। केंद्रीय गृहमंत्री अमित शाह यांनी शुक्रवारी सांगितले की, देशाच्या स्वातंत्र्यानंतर आणि फाळणीनंतर दीर्घकाळ काही लोकांनी ‘वंदे मातरम्’चा मनापासून स्वीकार केला नाही. त्यांनी सांगितले की, संसदेत हे गीत गायले जात असे आणि सर्वजण सन्मानार्थ उभे राहत असत. मात्र स्वातंत्र्यानंतरही त्याची संपूर्ण आवृत्ती गायली जात नसल्याची खंत त्यांना नेहमीच वाटत होती.

अमित शाह यांनी ही माहिती दार्जिलिंग जिल्ह्यातील सिलीगुडी येथे सशस्त्र सीमा दल (एसएसबी)च्या अधिकारी आणि जवानांना संबोधित करताना दिली. यावेळी त्यांनी जवानांशी संवाद साधला आणि सिलीगुडीमध्ये अनेक प्रकल्पांची पायाभरणीही केली.

त्यांनी सांगितले की, यावर्षीचा स्वातंत्र्यदिनाचा सोहळा त्यांच्यासाठी विशेष ठरला. शाह यांनी सांगितले की, 2014 पासून पंतप्रधान नरेंद्र मोदी जेव्हा जेव्हा लाल किल्ल्यावरून स्वातंत्र्यदिनाच्या दिवशी राष्ट्रीय ध्वज फडकवतात, तेव्हा ते तेथे उपस्थित राहिले आहेत. मात्र यावेळी 80वा स्वातंत्र्यदिन सोहळा वेगळा ठरला, कारण प्रथमच संपूर्ण ‘वंदे मातरम्’ गायले गेले. गृहमंत्र्यांनी ‘वंदे मातरम्’ची रचना करणारे बंकिमचंद्र चट्टोपाध्याय यांचे स्मरण करताना सांगितले की, या रचनेने केवळ स्वातंत्र्य चळवळीला गती दिली नाही, तर स्वतंत्र भारताच्या संकल्पनेलाही दिशा दिली. त्यांनी सांगितले की, बंकिमचंद्र चट्टोपाध्याय यांनी आपल्या रचनेच्या माध्यमातून स्वतंत्र भारत कसा असावा, हे सांगण्याचा प्रयत्न केला.

सीमा सुरक्षा आणि सीमेवर कुंपण घालण्यासाठी जमीन वाटपाच्या मुद्द्यावर अमित शाह यांनी मुख्यमंत्री शुभेंदू अधिकारी यांचे कौतुक केले. त्यांनी सांगितले की, मुख्यमंत्रिपदाची सूत्रे हाती घेतल्यानंतर सीमेवर कुंपण घालण्यासाठी जमीन वाटपाचे दीर्घकाळ प्रलंबित असलेले काम वेगाने पुढे गेले आहे. राज्य सरकारने आतापर्यंत यासाठी 1,129 एकर जमीन वाटप केली आहे. अमित शाह यांनी माजी मुख्यमंत्री ममता बॅनर्जी यांच्यावर निशाणा साधत सांगितले की, त्यांच्या कार्यकाळात त्यांनी अनेक वेळा सीमेवर कुंपण घालण्यासाठी जमीन उपलब्ध करून देण्याची विनंती केली होती. मात्र त्यांच्या आवाहनाकडे लक्ष देण्यात आले नाही. त्यांनी सांगितले की, केंद्र सरकार राज्याकडून भाजपसाठी नव्हे, तर देशाची सीमा आणि नागरिकांच्या सुरक्षेसाठी जमीन मागत होते.

या प्रसंगी अमित शाह यांनी प्रसिद्ध शहनाईवादक उस्ताद बिस्मिल्लाह खान यांना त्यांच्या पुण्यतिथीनिमित्त श्रद्धांजलीही अर्पण केली. त्यांनी बिस्मिल्लाह खान यांच्याशी संबंधित एक प्रसंग सांगताना म्हटले की, जेव्हा त्यांना विचारण्यात आले होते की, संसद, राष्ट्रपतींसमोर आणि मोठ्या कार्यक्रमांमध्ये शहनाई वाजवल्यानंतर त्यांना सर्वाधिक आनंद कुठे मिळतो, तेव्हा त्यांनी गंगेच्या काठी सकाळी काशी विश्वनाथाच्या उपस्थितीत शहनाई वाजवणे हाच सर्वांत मोठा आनंद असल्याचे सांगितले होते.

---------------

हिंदुस्थान समाचार / Suraj Chaugule