नवी दिल्ली, 21 ऑगस्ट (हिं.स.)। पंतप्रधान नरेंद्र मोदी यांनी शुक्रवारी सेवा तीर्थ येथे देशातील २० अंतराळ स्टार्टअपच्या सीईओ आणि संस्थापकांशी संवाद साधला. यावेळी अंतराळ क्षेत्रात भारतातील खासगी कंपन्यांच्या वाढत्या क्षमता, जागतिक स्तरावर भारतीय अंतराळ तंत्रज्ञानाची वाढती मागणी आणि अंतराळ क्षेत्रातील भविष्यातील संधी यावर चर्चा झाली.

पंतप्रधान कार्यालयानुसार, बैठकीत रॉकेट बनवणे, पुन्हा वापरता येणारी अंतराळ याने आणि प्रक्षेपण याने, उपग्रह, अंतराळाशी संबंधित इलेक्ट्रॉनिक प्रणाली, नवीन तंत्रज्ञानाच्या माध्यमातून रॉकेट इंजिन तयार करणे, अंतराळ आणि संरक्षणाशी संबंधित माहिती, अंतराळात जमा होणारा कचरा हटवणे तसेच आर्टिफिशियल इंटेलिजन्सच्या मदतीने स्थानिक हवामान आणि वातावरणाची माहिती देणाऱ्या तंत्रज्ञानावर काम करणाऱ्या स्टार्टअपचे प्रमुख सहभागी झाले होते.

स्टार्टअप प्रमुखांनी अंतराळ क्षेत्रात खासगी कंपन्यांना काम करण्याची परवानगी देण्याच्या सरकारच्या निर्णयाचे स्वागत केले. त्यांनी सांगितले की, या निर्णयामुळे उद्योगासाठी अनेक नवीन संधी निर्माण झाल्या आहेत. भारतातील खासगी अंतराळ कंपन्यांनी विकसित केलेले तंत्रज्ञान स्वीकारण्यासाठी आणि त्याचा वापर करण्यासाठी जगातील अनेक देशांतील कंपन्या उत्सुक असल्याचेही त्यांनी सांगितले. पंतप्रधानांनी अंतराळ क्षेत्राशी संबंधित उद्योजकांना आपल्या तंत्रज्ञानाचे नवीन उपयोग शोधण्यास आणि सामान्य नागरिकांचे जीवन अधिक सोपे होईल असे तंत्रज्ञान विकसित करण्यावर लक्ष केंद्रित करण्यास सांगितले.

मोदी यांनी अंतराळ उद्योग आणि समाजाच्या विकासाशी संबंधित इतर क्षेत्रांमधील सहकार्य वाढवण्यावरही भर दिला. त्यांनी सांगितले की, अंतराळातील कचरा हटवण्याच्या तंत्रज्ञानावर काम करणाऱ्या कंपन्या पर्यावरणाशी संबंधित संस्थांसोबत मिळून काम करू शकतात. त्याचप्रमाणे, शेतीसाठी अंतराळ तंत्रज्ञान विकसित करणाऱ्या कंपन्या कृषी विद्यापीठे आणि सरकारी विभागांसोबत मिळून शेतकऱ्यांना चांगले निर्णय घेण्यास आणि उत्पादन वाढवण्यास मदत करू शकतात. पंतप्रधानांनी सांगितले की, भारताने असे वातावरण निर्माण केले पाहिजे की, जेव्हा जग अंतराळ क्षेत्राचा विचार करेल, तेव्हा त्याची नजर भारताकडे वळली पाहिजे. भारताचे अंतराळ क्षेत्र जगभरातील प्रतिभावंत, कंपन्या आणि गुंतवणूक आकर्षित करण्याचे केंद्र बनू शकते, असे त्यांनी सांगितले.

त्यांनी अटल टिंकरिंग लॅब्ससोबत अंतराळ क्षेत्रातील कंपन्यांचे सहकार्य वाढवण्याचा सल्ला दिला. पंतप्रधानांनी सांगितले की, यामुळे लहान वयापासूनच मुलांमध्ये अंतराळाविषयी कुतूहल आणि रुची निर्माण होण्यास मदत होईल. या संवादामध्ये स्कायरूट एअरोस्पेस, अग्निकुल कॉसमॉस, पिक्सेल, ध्रुव स्पेस, गॅलेक्सआय, पिअरसाइट, बेलाट्रिक्स एअरोस्पेस, दिगंतरा, सॅटश्युअर, सुहोरा टेक्नॉलॉजीज, मनस्तु स्पेस, एस्ट्रोबेस, टेकमी२स्पेस, व्योमआयसी, कॉसमॉसर्व स्पेस, ऑर्बिटएआयडी एअरोस्पेस, स्कायसर्व (हायस्पेस), सेरेंडिपिटी स्पेस, वासर लॅब्स आणि मिस्टईओ यांचे प्रमुख व संस्थापक सहभागी झाले होते.

---------------

हिंदुस्थान समाचार / Suraj Chaugule