संसद मार्ग परिसरातील डीसीपी कार्यालयाबाहेर मांडले बस्तान
नवी दिल्ली, 21 ऑगस्ट (हिं.स.) : जंतर-मंतर येथे झालेल्या आंदोलनादरम्यान पॅलेट गनचा वापर केल्याच्या प्रकरणात एफआयआर दाखल करण्याच्या मागणीसाठी काँग्रेस नेते राहुल गांधी शुक्रवारी पार्लमेंट स्ट्रीट पोलीस ठाण्यातील डीसीपी कार्यालयात पोहोचले. एफआयआर दाखल न झाल्याने राहुल गांधी काँग्रेस कार्यकर्त्यांसह पोलीस ठाण्याबाहेर धरण्यावर बसले.
पॅलेट गनचा वापर करणाऱ्या पोलिस कर्मचाऱ्यांवर कारवाई करण्याची मागणी करत राहुल गांधी यांनी सांगितले की, जोपर्यंत या प्रकरणात एफआयआर दाखल होत नाही, तोपर्यंत आपण पोलीस ठाण्यातच बसून राहणार आहोत. पोलिसांच्या म्हणण्यानुसार, या प्रकरणाची दिल्ली पोलीस आणि क्राइम ब्रँचच्या पथकाकडून चौकशी सुरू आहे. तपास पूर्ण झाल्यानंतर पुढील कारवाई केली जाईल.मात्र, राहुल गांधी आपल्या मागणीवर ठाम राहिले. या प्रकरणात आजच FIR दाखल करण्यात यावी, अशी त्यांची मागणी आहे. काँग्रेस नेते आणि कार्यकर्त्यांची संख्या वाढत असल्याचे पाहून पोलिसांनी घटनास्थळी बॅरिकेडिंग केली. खबरदारीचा उपाय म्हणून कनॉट प्लेसकडून संसद मार्ग पोलीस ठाण्याकडे जाणाऱ्या वाहनांच्या प्रवेशावरही निर्बंध घालण्यात आले.
काँग्रेस नेत्यांचे आंदोलन सुरू असताना उपायुक्त सचिन शर्मा कार्यालयाबाहेर आले आणि त्यांनी नेत्यांशी चर्चा करण्याचा प्रयत्न केला. त्यानंतर त्यांनी काँग्रेस नेत्यांना पोलीस ठाण्याच्या आत चर्चेसाठी बोलावले. दरम्यान, प्रियंका गांधी देखील पोलीस ठाण्यात पोहोचल्या असून राहुल यांच्या आंदोलनात सहभागी झाल्या आहेत.
राहुल गांधी यांनी ट्विटरवर (एक्स) पोस्ट करत आरोप केला की, 20 जुलै रोजी जंतर-मंतर येथे शांततापूर्ण आंदोलनादरम्यान साहिल लोचब यांच्यावर पोलिसांनी पॅलेट गनचा वापर केला. या घटनेत साहिल गंभीर जखमी झाले असून त्यांच्या एका डोळ्याच्या दृष्टीला धोका असल्याचा दावा राहुल गांधी यांनी केला.राहुल म्हणाले की, शांततापूर्ण आंदोलनाविरोधात करण्यात आलेली अशी कारवाई गंभीर स्वरूपाचा गुन्हा आहे आणि पीडिताला न्याय मिळवून देण्यासाठी एफआयआर दाखल केली पाहिजे. एफआयआर दाखल न केल्याने संविधान आणि नागरिकांच्या घटनात्मक अधिकारांचे उल्लंघन होत असल्याचा आरोपही त्यांनी केला. या प्रकरणावरून काँग्रेस नेते आणि दिल्ली पोलिसांमध्ये चर्चा सुरू असून, पोलीस तपास पूर्ण झाल्यानंतर वस्तुस्थितीच्या आधारे पुढील कारवाई केली जाईल, असे सांगत आहेत. मात्र, राहुल गांधी तातडीने एफआयआर दाखल करण्याच्या मागणीवर ठाम आहेत.-----------------
हिंदुस्थान समाचार / मनीष कुलकर्णी
