गुवाहाटी, 22 ऑगस्ट (हिं.स.)। आसामच्या अनेक भागांत पाण्याची पातळी कमी होत असल्याने परिस्थिती सुधारत आहे. मात्र, शिवसागर, गोलाघाट, जोरहाट, नागाव, धेमाजी आणि कछार जिल्ह्यांमध्ये पुराचे संकट आणि त्याचा परिणाम अद्याप कायम आहे. या जिल्ह्यांमध्ये पुरामुळे ७३ गावांतील १५,५१२ नागरिक अजूनही प्रभावित आहेत. प्रशासन आणि आपत्ती व्यवस्थापनाची पथके प्रभावित भागात मदत आणि बचावकार्यात व्यस्त आहेत.

आसाम राज्य आपत्ती व्यवस्थापन प्राधिकरणाने (एएसडीएमए) जारी केलेल्या आकडेवारीनुसार, सर्व नद्या धोक्याच्या पातळीखाली वाहत आहेत. यंदाच्या पुरात मृत्यू झालेल्या लोकांची संख्या १०६ वर पोहोचली आहे. पुरामुळे सर्वाधिक नुकसान शिवसागर, चराईदेव, जोरहाट आणि गोलाघाट जिल्ह्यांत झाले आहे. सध्या राज्यातील एकूण ६ जिल्ह्यांमध्ये पुराची स्थिती कायम आहे. प्रभावित जिल्ह्यांमध्ये शिवसागर, धेमाजी, गोलाघाट, जोरहाट, नागाव आणि कछार यांचा समावेश आहे. पुरामुळे ६ जिल्ह्यांतील १३ महसूल मंडळांमधील एकूण ७३ गावे प्रभावित झाली आहेत. सध्या राज्यातील एकूण १५,५१२ नागरिक प्रभावित असून ६,२९९ हेक्टर कृषी जमीन पाण्याखाली आहे.

राज्य सरकारने पुरामुळे प्रभावित लोकांसाठी अद्याप एकूण ५ मदत छावण्या आणि ३ मदत वितरण केंद्रांसह एकूण ८ छावण्या कार्यान्वित ठेवल्या आहेत. मदत छावण्यांमध्ये १८३ लोकांनी आश्रय घेतला आहे, तर मदत वितरण केंद्रांवर ४,९७९ छावणीबाहेरील नागरिकांना मदत मिळत आहे. बुधवारी पुरामुळे प्रभावित झालेल्या जनावरांची एकूण संख्या ९,६४२ नोंदवण्यात आली आहे.

२१ ऑगस्टच्या आकडेवारीनुसार, पुराच्या पाण्यामुळे शिवसागर जिल्ह्यात पूर्णपणे नुकसान झालेल्या कच्च्या घरांची एकूण संख्या १२, तर पूर्णपणे नुकसान झालेल्या पक्क्या घरांची एकूण संख्या ५ असल्याचे सांगण्यात आले आहे. शिवसागर जिल्ह्यात अंशतः नुकसान झालेल्या कच्च्या घरांची संख्या १० नोंदवण्यात आली आहे. शिवसागर जिल्ह्यात नुकसान झालेल्या पक्क्या घरांची एकूण संख्या ३ आहे. नुकसान झालेल्या इतर झोपड्यांची एकूण संख्या शिवसागर जिल्ह्यात ७ आहे. तसेच नुकसान झालेल्या इतर जनावरांच्या गोठ्यांची शिवसागर जिल्ह्यात एकूण संख्या ७ आहे. पुरग्रस्त भागात बुधवारी राज्य सरकारकडून एका वैद्यकीय पथकाची नियुक्ती करण्यात आली.

पुरामुळे प्रभावित लोकांमध्ये राज्य सरकारकडून तांदूळ (क्विंटलमध्ये) ८२.८९२, डाळ (क्विंटलमध्ये) १५.१२८, मीठ (क्विंटलमध्ये) ४.५५१२, मोहरीचे तेल (लिटरमध्ये) ३२५.५३ इतकी मदत सामग्री वितरित करण्यात आली. जनावरांसाठी चारा म्हणून गव्हाचा कोंडा (क्विंटलमध्ये) ३३४.३ देखील वितरित करण्यात आला.

राज्य सरकारकडून पुरग्रस्त भागांमध्ये मोठ्या प्रमाणावर झालेल्या रस्ते, पूल आणि इतर पायाभूत सुविधांच्या नुकसानीचे मूल्यांकन केले जात आहे. तसेच प्रभावित नागरिकांच्या मदतीसाठी आर्थिक मदत आणि इतर साहित्यही उपलब्ध करून दिले जात आहे. राज्य सरकारच्या विविध मंत्रालये आणि विभागांकडून सातत्याने आढावा बैठका घेऊन आवश्यक पावले उचलली जात आहेत. दरम्यान, प्रदेशाचे मुख्यमंत्री डॉ. हिमंत बिस्व सरमा यांनी दिल्लीत पंतप्रधान आणि केंद्रीय मंत्र्यांची भेट घेऊन राज्यातील सध्याच्या परिस्थितीची माहिती दिली असून, आवश्यक पावले उचलण्याबाबतही माहिती दिली आहे.

---------------

हिंदुस्थान समाचार / Suraj Chaugule