नवी दिल्ली, 26 ऑगस्ट (हिं.स.)। पश्चिम आशियातील तणाव आणखी वाढण्याची शक्यता आणि अमेरिकेकडून इराणविरोधात आर्थिक निर्बंध कडक करण्याच्या इशाऱ्यामुळे भारतीय शेअर बाजारावर दबाव निर्माण झाला. आज बाजाराची सुरुवात मजबुतीने झाली होती. मात्र, सुरुवातीच्या खरेदीचा उत्साह फार काळ टिकला नाही आणि त्यानंतर झालेल्या जोरदार विक्रीमुळे सेन्सेक्स आणि निफ्टी दोन्ही घसरणीसह बंद झाले. दिवसअखेर सेन्सेक्स १८३.१५ अंक म्हणजेच ०.२४ टक्क्यांनी घसरून ७७,४७२.९४ अंकांवर, तर निफ्टी १२६.८० अंक म्हणजेच ०.५२ टक्क्यांनी घसरून २४,२०७.७५ अंकांवर बंद झाला.

बॉम्बे स्टॉक एक्स्चेंजचा सेन्सेक्स २३६.०१ अंकांच्या वाढीसह ७७,८९२.१० अंकांवर उघडला. सुरुवातीच्या व्यवहारात खरेदी वाढल्याने तो ३३०.७५ अंकांनी वाढून ७७,९८६.८४ अंकांच्या उच्चांकी पातळीवर पोहोचला. मात्र, त्यानंतर विक्रीचा दबाव वाढल्याने सेन्सेक्सने संपूर्ण वाढ गमावली. नॅशनल स्टॉक एक्स्चेंजचा निफ्टीही ७.४० अंकांच्या किरकोळ वाढीसह २४,३४१.९५ अंकांवर उघडला आणि सुरुवातीला २४,३७८.६० अंकांपर्यंत पोहोचला. त्यानंतर झालेल्या विक्रीमुळे निफ्टी २४,२०७.७५ अंकांवर बंद झाला.

क्षेत्रीय निर्देशांकांमध्ये धातू आणि खासगी बँक क्षेत्रातील समभागांची खरेदी झाली. सार्वजनिक क्षेत्रातील बँका आणि आरोग्यसेवा क्षेत्रानेही चांगली कामगिरी केली. मात्र, माहिती-तंत्रज्ञान आणि पायाभूत सुविधा क्षेत्रातील समभागांमध्ये मोठी विक्री झाली. वाहन, भांडवली वस्तू, ग्राहक टिकाऊ वस्तू, जलद वापराच्या ग्राहक वस्तू, तेल व वायू, सार्वजनिक उपक्रम आणि स्थावर मालमत्ता क्षेत्रातील निर्देशांकही घसरणीसह बंद झाले. मध्यम आकाराच्या कंपन्यांच्या समभागांवर विक्रीचा दबाव राहिल्याने निफ्टी मिडकॅप निर्देशांक ०.१० टक्क्यांनी घसरला. दुसरीकडे, छोट्या कंपन्यांच्या समभागांना मागणी मिळाल्याने निफ्टी स्मॉलकॅप निर्देशांक ०.८१ टक्क्यांनी वधारला.

बाजारातील घसरणीमुळे गुंतवणूकदारांच्या संपत्तीत सुमारे ८२ हजार कोटी रुपयांची घट झाली. बॉम्बे स्टॉक एक्स्चेंजवर नोंदणीकृत कंपन्यांचे एकूण बाजारमूल्य ४९३.८२ लाख कोटी रुपयांवर आले. मागील सत्रात हे मूल्य ४९४.६४ लाख कोटी रुपये होते.

दिवसभरातील व्यवहारादरम्यान, बीएसईवर ४,५४० शेअर्समध्ये सक्रियपणे व्यवहार झाला. यापैकी २,३७५ शेअर्स वाढीसह बंद झाले, १,९४४ शेअर्समध्ये घट झाली आणि २२१ शेअर्समध्ये कोणताही बदल झाला नाही. त्याचप्रमाणे, एनएसईवर ३,१२७ शेअर्समध्ये सक्रिय व्यवहार झाले. यापैकी १,७३६ शेअर्स वाढीसह बंद झाले, तर १,३९१ शेअर्स घसरणीसह बंद झाले. त्याचप्रमाणे, सेन्सेक्समधील ३० शेअर्सपैकी १३ शेअर्स वाढीसह बंद झाले, तर १७ शेअर्स घसरणीसह बंद झाले. निफ्टीमधील ५० शेअर्सपैकी १४ शेअर्स वाढीसह आणि ३६ शेअर्स घसरणीसह बंद झाले. सेन्सेक्समधील कोटक महिंद्रा बँक, ॲक्सिस बँक, जेएसडब्ल्यू स्टील, अल्ट्राटेक सिमेंट आणि एचडीएफसी लाइफ हे प्रमुख वाढणारे समभाग ठरले. तर भारती एअरटेल, पॉवर ग्रिड कॉर्पोरेशन, इन्फोसिस, लार्सन अँड टुब्रो आणि नेस्ले इंडिया यांच्या समभागांमध्ये मोठी घसरण झाली.

---------------

हिंदुस्थान समाचार / Suraj Chaugule