सर्व प्रवाशांना रेल्वेने महाराष्ट्राकडे केले रवाना

पाटणा, 29 ऑगस्ट (हिं.स.)। नेपाळमध्ये आलेल्या पुरामुळे काठमांडूमध्ये अडकलेल्या महाराष्ट्रातील सुमारे 100 तीर्थयात्रेकरूंना बिहार सरकारच्या मदतीने सुरक्षित बाहेर काढून त्यांच्या गृह राज्यासाठी रवाना करण्यात आले. महाराष्ट्र सरकारच्या विनंतीवरून मानवतावादी दृष्टिकोनातून बिहार सरकारने त्यांच्या मदतीसाठी आणि सुरक्षित परतीसाठी संपूर्ण व्यवस्था केली.

बिहारच्या मुख्यमंत्र्यांच्या निर्देशानुसार तसेच मुख्य सचिव आणि आपत्ती व्यवस्थापन विभागाच्या प्रधान सचिवांच्या देखरेखीखाली सीतामढी जिल्हा प्रशासनाने 28 ऑगस्ट 2026 रोजी तातडीने कारवाई केली. सर्व तीर्थयात्रेकरूंना नेपाळ सीमेपासून सुरक्षित एस्कॉर्ट करून सीतामढी येथे आणण्यात आले. येथे त्यांच्यासाठी भोजन, पिण्याचे पाणी आणि इतर आवश्यक सुविधांची व्यवस्था करण्यात आली.

यानंतर 29 ऑगस्टच्या रात्री सुमारे 2:30 वाजता सर्व तीर्थयात्रेकरूंना सीतामढीहून पाटणा येथे आणण्यात आले. पाटणा जिल्हा प्रशासनाने त्यांना ओ.पी. साह सामुदायिक भवनात मुक्कामाची व्यवस्था केली. येथे भोजन, निवास, वैद्यकीय तपासणी आणि इतर आवश्यक सुविधा उपलब्ध करून देण्यात आल्या. तीर्थयात्रेकरूंच्या सुरक्षित घरवापसीसाठी बिहार सरकारच्या मुख्य सचिवांनी रेल्वे बोर्डाच्या अध्यक्षांशी समन्वय साधला. त्यानंतर पाटणा-पूर्णा एक्सप्रेसमध्ये दोन अतिरिक्त डबे जोडण्यात आले. 29 ऑगस्ट रोजी सकाळी 7:30 वाजता सर्व तीर्थयात्रेकरूंना विशेष व्यवस्थेअंतर्गत रेल्वेने महाराष्ट्रासाठी रवाना करण्यात आले.सुरक्षित आणि सन्मानपूर्वक घरवापसी झाल्यानंतर तीर्थयात्रेकरूंनी बिहार सरकारसोबतच सीतामढी आणि पाटणा जिल्हा प्रशासनाचे आभार मानले. पुराच्या परिस्थितीत करण्यात आलेल्या तातडीच्या कारवाईबद्दल, संवेदनशीलतेबद्दल आणि समन्वयित मदतकार्याबद्दल त्यांनी अधिकाऱ्यांचे आभार व्यक्त केले.

------------------

हिंदुस्थान समाचार / Suraj Chaugule