रत्नागिरी, 3 ऑगस्ट (हिं.स.) । कळमुंडी (ता. चिपळूण) येथील हनुमानवाडी परिसरात घरफोडीची घटना उघडकीस आली असून, घरातील मोलकरणीने साथीदाराच्या मदतीने ५ लाख ८८ हजार ६०० रुपयांचा ऐवज व रोख रक्कम चोरून नेल्याप्रकरणी चिपळूण पोलिस ठाण्यात गुन्हा दाखल करण्यात आला आहे.

याप्रकरणी सुयोग संतोष बेलवलकर (वय ३०, व्यवसाय – हॉटेल, रा. हनुमानवाडी, कळमुंडी) यांनी फिर्याद दिली आहे. फिर्यादीनुसार, ३१ जुलै रोजी सकाळी ५ ते १ ऑगस्ट रोजी सायंकाळी ७ या कालावधीत घर बंद असल्याची संधी साधून आरोपींनी घराच्या दर्शनी दरवाजाचा कडी-कोयंडा तोडून आत प्रवेश केला. त्यानंतर बेडरूममधील कपाटातून सोन्याचे दागिने आणि रोख रक्कम असा एकूण ५ लाख ८८ हजार ६०० रुपयांचा ऐवज चोरून नेला.

चोरीस गेलेल्या ऐवजात मंगळसूत्र, कानातील दागिने, सोन्याची चेन, ब्रेसलेट, पेंडंट, अंगठ्या, सोन्याची नाणी, नथ, सोन्याचे मणी तसेच १८ हजार ६०० रुपयांची रोख रक्कम यांचा समावेश आहे.

या प्रकरणी दीपिका दिलीप बोबले (वय ४०, रा. आवेरीवाडी, कळमुंडी) व गणेश काशिराम गोरीवले (वय ३१, रा. कळमुंडी) यांच्याविरुद्ध गुन्हा दाखल करण्यात आला आहे.

---------------

हिंदुस्थान समाचार / रत्नागिरी