बीजिंग , 09 ऑगस्ट (हिं.स.)।तैवानमध्ये मोठ्या प्रमाणात हानी केल्यानंतर आता ‘डॉल्फिन’ चक्रीवादळ चीनच्या पूर्व किनारपट्टीच्या दिशेने वेगाने सरकत आहे. चक्रीवादळाचा धोका लक्षात घेता शांघायमधील दोन्ही प्रमुख विमानतळांवरून रविवारी 1,300 हून अधिक उड्डाणे रद्द करण्यात आली आहेत.

चक्रीवादळ ‘डॉल्फिन’ने शनिवारी राजधानी तैपेईसह उत्तर तैवानला मोठा तडाखा दिला. या चक्रीवादळामुळे उत्तर तैवानमध्ये मुसळधार पाऊस झाला असून, चीनच्या पूर्व किनारपट्टीवर पूर आणि भूस्खलनाचा धोका निर्माण झाला आहे. चक्रीवादळाच्या पार्श्वभूमीवर काही तैवानी विमान कंपन्यांनी रविवारी चीनला जाणारी उड्डाणेही रद्द केली.

अहवालानुसार, रविवारी सकाळपर्यंत ‘डॉल्फिन’ चक्रीवादळाचा कमाल सातत्यपूर्ण वाऱ्याचा वेग सुमारे 162 किलोमीटर प्रतितास होता. रविवारी संध्याकाळपर्यंत हे चक्रीवादळ चीनमधील झेजियांग प्रांत तसेच शेजारील फुजियान प्रांताच्या उत्तरेकडील भागाला धडकण्याची शक्यता आहे.

चीनच्या हवामान विभागानुसार, आगामी काही दिवसांत काही भागांमध्ये 200 ते 400 मिमीपर्यंत पाऊस पडण्याची शक्यता आहे. त्यामुळे गंभीर पूर आणि भूस्खलनाचा धोका वाढला आहे. या चक्रीवादळाचा सर्वाधिक परिणाम झेजियांग आणि फुजियान प्रांतांमध्ये होण्याची शक्यता असून, संभाव्य धोका लक्षात घेऊन दोन्ही प्रांतांमध्ये अलर्ट जारी करण्यात आला आहे.

शांघायच्या सरकारी माध्यम संस्थाच्या माहितीनुसार, शांघायमधील हाँगचियाओ आणि पुडोंग विमानतळांनी रविवारी नियोजित असलेल्या जवळपास 60 टक्के उड्डाणे रद्द केली. दोन्ही विमानतळांवर मिळून 1,300 हून अधिक उड्डाणे रद्द करण्यात आली आहेत.

चक्रीवादळ धडकण्यापूर्वी झेजियांग प्रांताच्या प्रशासनाने नौका आणि क्रूझ सेवांसह जलमार्गाशी संबंधित सर्व प्रकारच्या हालचालींवर बंदी घातली आहे. या चक्रीवादळामुळे पूर्व चीनमधील अनेक भागांमध्ये मुसळधार पाऊस आणि वेगवान वारे वाहण्याची शक्यता आहे. संभाव्य धोका लक्षात घेऊन प्रशासनाने नागरिकांना सतर्क राहण्याचे आवाहन केले आहे. तसेच पूर आणि भूस्खलनासारख्या नैसर्गिक आपत्तींपासून बचाव करण्यासाठी आवश्यक ती खबरदारी घेण्याचा सल्ला देण्यात आला आहे.

चक्रीवादळाच्या धोक्यामुळे स्थानिक प्रशासनाने संभाव्य धोकादायक भागांमधील नागरिकांना सुरक्षित स्थळी हलवण्यास सुरुवात केली आहे. झेजियांग प्रांतातील ताइझोउ शहरातून शनिवारी संध्याकाळपर्यंत सुमारे 3 लाख 90 हजार नागरिकांना सुरक्षित स्थळी हलवण्यात आले. तर शांघायमधील अतिधोकादायक भागांमधून 30 हजारांहून अधिक नागरिकांना सुरक्षित ठिकाणी स्थलांतरित करण्यात आले आहे.

---------------

हिंदुस्थान समाचार / Priyanka Bansode