नवी दिल्ली , 09 ऑगस्ट (हिं.स.)।दिल्लीतील लाल किल्ल्यावर होणाऱ्या स्वातंत्र्यदिनाच्या सोहळ्याच्या पार्श्वभूमीवर सुरक्षा व्यवस्था अधिक कडक करण्यात आली आहे. उत्तर दिल्लीचे डीसीपी राजा बांठिया यांनी सांगितले की, सुरक्षा तैनातीची योजना मनुष्यबळ आणि तांत्रिक सुरक्षा व्यवस्था अशा दोन भागांत विभागण्यात आली आहे.

स्वातंत्र्यदिनाच्या सोहळ्यादरम्यान विविध सुरक्षा यंत्रणांचे सुमारे १५ ते २० हजार जवान तैनात करण्यात येणार आहेत. या सुरक्षा व्यवस्थेत दिल्ली पोलिसांचे वाहतूक विभाग, उत्तर जिल्ह्यातील पथके, स्थानिक पोलीस, पीसीआर, स्पेशल ब्रांच आणि स्पेशल सेलसह इतर सुरक्षा दलांचा समावेश असेल. याशिवाय मोठ्या संख्येने निमलष्करी दलांच्या तुकड्या, कमांडो आणि एनएसजीच्या पथकांनाही तैनात करण्यात येणार आहे. यामध्ये हिट टीम्स आणि स्नायपर्सचाही समावेश असेल.कोणत्याही संभाव्य आपत्कालीन परिस्थितीचा सामना करण्यासाठी एनडीआरएफचे पथकही तैनात असेल. तसेच क्विक रिस्पॉन्स टीम्स (QRT) महत्त्वाच्या ठिकाणी आणि वॉचटॉवरवर तैनात केल्या जातील.

तांत्रिक सुरक्षा व्यवस्थेअंतर्गत लाल किल्ला आणि आसपासच्या परिसरात एक हजारहून अधिक सीसीटीव्ही कॅमेरे बसवण्यात आले आहेत. या कॅमेऱ्यांच्या निगराणीसाठी नियंत्रण कक्ष उभारण्यात आले असून, तेथे प्रशिक्षित कर्मचारी सीसीटीव्ही कॅमेऱ्यांच्या लाइव्ह फीडवर सतत लक्ष ठेवतील. जमिनीवरून तातडीने कारवाई करणाऱ्या पथकांसाठीही विशेष ठिकाणे निश्चित करण्यात आली आहेत.

डीसीपी यांनी सांगितले की, गरजेनुसार विविध ठिकाणी व्हिडिओ अॅनालिटिक्स तंत्रज्ञानाचाही वापर करण्यात आला आहे. यामध्ये फेसियल रिकग्निशन सिस्टम (FRS), नंबर प्लेट रिकग्निशन सिस्टम आणि घुसखोरी शोधणारी यंत्रणा यांचा समावेश आहे. काही पोलीस कर्मचारी बॉडी-वॉर्न कॅमेऱ्यांनीही सज्ज असतील.ड्रोनच्या माध्यमातून उद्भवू शकणाऱ्या संभाव्य धोक्यांचा सामना करण्यासाठी अँटी-ड्रोन सिस्टमही बसवण्यात आली आहे. याशिवाय पोलीस ऑनलाइन सोशल मीडियावरील हालचाली आणि चर्चांवरही लक्ष ठेवून आहेत.

डीसीपी यांनी सांगितले की, सुरक्षा व्यवस्थेसंदर्भातील सर्व ब्रीफिंग आणि प्रशिक्षण सत्रे पूर्ण झाली असून, स्वातंत्र्यदिनाच्या सोहळ्यासाठी दिल्ली पोलीस पूर्णपणे सज्ज आहेत.

---------------

हिंदुस्थान समाचार / Priyanka Bansode