मुंबई, 01 सप्टेंबर (हिं.स.)। नावी एएमसीने नावी निफ्टी आरईआयटी आणि रिॲल्टी इंडेक्स फंड लॉन्च करण्याची घोषणा केली आहे. हा एक ओपन-एंडेड इंडेक्स फंड असून, त्याचे उद्दिष्ट निफ्टी आरईआयटी आणि रिॲल्टी इंडेक्सच्या कामगिरीची पुनरावृत्ती करणे आणि त्याचा मागोवा घेणे हे आहे. या इंडेक्समध्ये सूचीबद्ध रिअल इस्टेट इन्व्हेस्टमेंट ट्रस्ट्स (आरईआयटी) आणि रिअल इस्टेट विकास कंपन्यांचा समावेश आहे. त्यामुळे गुंतवणूकदारांना सूचीबद्ध रिअल इस्टेट क्षेत्रातील संपूर्ण मूल्यसाखळीत विविध प्रकारे गुंतवणूक करण्याची संधी मिळते. नवीन फंड ऑफर (एनएफओ) १ सप्टेंबर २०२६ रोजी सुरू होईल आणि १० सप्टेंबर २०२६ रोजी बंद होईल.

फंड आणि इंडेक्सचा आढावा

ही योजना निफ्टी आरईआयटी आणि रिॲल्टी टोटल रिटर्न इंडेक्सची पुनरावृत्ती करेल. हा फ्री-फ्लोट मार्केट कॅपिटलायझेशननुसार भारित केलेला इंडेक्स असून, त्यात सार्वजनिकरित्या सूचीबद्ध आरईआयटी आणि रिॲल्टी क्षेत्रातील जास्तीत जास्त १५ कंपन्यांचा समावेश असेल. यामध्ये आरईआयटीचा किमान भार ६० टक्के आणि कोणत्याही एका सिक्युरिटीचा कमाल भार १५ टक्के असेल. एनएसई इंडिसेजने निर्धारित केलेल्या पद्धतीनुसार या इंडेक्सची देखभाल आणि पुनर्संतुलन दर तिमाही केले जाते.

फंडाचा उद्देश

या योजनेचे गुंतवणूक उद्दिष्ट निफ्टी आरईआयटी आणि रिॲल्टी इंडेक्सच्या अनुरूप परतावा मिळवणे हे आहे. यासाठी ही योजना निफ्टी आरईआयटी आणि रिॲल्टी इंडेक्समध्ये समाविष्ट असलेल्या कंपन्यांच्या समभागांमध्ये गुंतवणूक करेल. ही गुंतवणूक ट्रॅकिंग एररच्या अधीन असेल. या योजनेचे गुंतवणूक उद्दिष्ट साध्य होईल याची कोणतीही हमी नाही.

---------------

हिंदुस्थान समाचार / Suraj Chaugule