विंडहोक (नामिबिय), 01 सप्टेंबर (हिं.स.) : झिम्बाब्वेने एका रोमांचक सामन्यात नामिबियावर मात करत तिरंगी मालिकेत आपला पहिला विजय नोंदवला. त्यांनी तिसऱ्या सामन्यात यजमानांना 5 धावांनी पराभूत केले. पहिल्यांदा फलंदाजी करताना रायन बर्लच्या ५७ आणि ब्रॅड इव्हान्सच्या ३७ धावांच्या जोरावर झिम्बाब्वेने 6 गडी गमावून १९५ धावा केल्या. प्रत्युत्तरात, नामिबियाचा संघ १९० धावांवर गारद झाला.

लक्ष्याचा पाठलाग करताना, नामिबियाने ७६ धावांत सहा गडी गमावले. झिम्बाब्वेचा विजय निश्चित वाटत होता. पण, झेन ग्रीन (५४) आणि अलेक्झांडर बसिंग-वॉल्शेंक (५६) यांच्यातील सातव्या विकेटसाठी ११० धावांच्या भागीदारीने नामिबियाला विजयाच्या जवळ आणले. या जोडीने १३ व्या षटकापासून पुढे प्रत्येक षटकात किमान १० धावा करत झटपट धावा केल्या. शेवटच्या पाच षटकांत विजयासाठी ७८ धावांची गरज असताना, शेवटच्या दोन षटकांत धावसंख्या ३३ धावांवर आली.

ग्रीन आणि व्होल्शेंक यांनी १९ व्या षटकात १७ धावा केल्या. आता शेवटच्या षटकात १६ धावांची गरज होती. ब्रॅड इव्हान्स गोलंदाजीसाठी आला. पहिला चेंडू नो-बॉल होता आणि धावत जाऊन दोन धावा काढल्या गेल्या. पुढचा चेंडू फ्री हिट होता, पण त्यावर फक्त दोन धावा झाल्या. मात्र, नामिबियाने एका चेंडूत पाच धावा काढल्या. आता त्यांना पाच चेंडूंमध्ये ११ धावांची गरज होती. तिथून सामन्याचे चित्र पालटले. सिकंदर रझाने दुसऱ्याच चेंडूवर ग्रीनला धावबाद केले. पण व्होल्शेंकने पुढच्याच चेंडूवर चौकार मारून तीन चेंडूंमध्ये सात धावांची गरज निर्माण केली. तो पुढच्याच चेंडूवर बाद झाला. त्यानंतर बर्नार्ड शोल्झ धावबाद झाला आणि शेवटच्या चेंडूवर इव्हान्सने जेक ब्रेसेलला त्रिफळाचीत करून नामिबियाला पराभूत केले.

तत्पूर्वी, बेन करन (३८) आणि ब्रायन बेनेट (३२) या जोडीने झिम्बाब्वेला चांगली सुरुवात करून दिली. या दोघांनी पॉवरप्लेमध्ये ६४ धावा जोडल्या. पण त्यानंतर डाव कोसळला. धावसंख्या झटपट ७९ धावांवर पाच गडी बाद झाली. डायोन मार्श (२), कर्णधार सिकंदर रझा (०) आणि वेस्ली माधेवेरे (३) स्वस्तात बाद झाले. तथापि, बर्लच्या ३२ चेंडूंतील अर्धशतक आणि इव्हान्सच्या २४ चेंडूंतील ३७ धावांच्या जोरावर संघाने १९५ धावांपर्यंत मजल मारली होती.

---------------

हिंदुस्थान समाचार / वृषाली देशपांडे